Almatylyq jumys berýshiler MÁMS qoryna 2 mlrd teńge tóledi

ALMATY. QazAqparat - Almaty jumys berýshileri men kásipkerleri tek qana shilde aıynda mindetti áleýmettik medıtsınalyq saqtandyrý qoryna - 2 mlrd teńge, bir jylda 19 mlrd teńge kóleminde aqsha aýdardy, dep habarlaıdy QazAqparat tilshisi. 

Bir ǵana shilde aıynda almatylyq jumys berýshiler men jeke kásipkerler mindetti medıtsınalyq áleýmettik saqtandyrý qoryna 2 mlrd teńgege jýyq soma aýdardy. 

Almaty aýdarymdar somasy boıynsha (23%) Qazaqstanda kósh bastap tur. Astana ekinshi orynǵa (12,5%) taban tiredi. Úshinshi orynda - Qaraǵandy oblysy (8,2%).

Aıta ketý kerek, 2017 jyldyń 1 shildesinen 2018 jyldyń 1 shildesine deıin almatylyq jumys berýshilerdiń salǵan somasy 17 mlrd teńge bolǵan edi. Osylaısha 2018 jyldyń shildesinde 2 mlrd teńge qosymsha túsim tústi. 

Al Qazaqstan boıynsha jınalǵan tólem kólemi 88,9 mlrd teńgege jetti. Qorǵa túsken qarjynyń barlyǵy QR Ulttyq bankinde saqtaýly. 
MÁMS qory men QR Ulttyq bank arasynda senimdi basqarý týraly kelisimge qol qoıylǵan. 

Al MÁMS aıasynda medıtsınalyq kómek kórsetý 2020 jyldan bastalady.