Almatylyq jastarǵa jaldamaly baspana qarashanyń sońynda beriledi

ALMATY. QazAqparat - Qarasha aıynyń sońyna deıin Almatyda jumys isteıtin jastarǵa 249 jaldamaly páter beriledi. Bul týraly Almaty qalasynyń Turǵyn úı saıasaty basqarma basshysynyń orynbasary Aıbek Saıdeldaev málimdedi, dep habarlaıdy QazAqparat tilshisi.

Almatyda jumys isteıtin jastardan ótinishter men qujattardy qabyldaý úshin qalalyq ákimdik almaty-jastary.kz arnaıy saıt ázirlegen bolatyn. Onda 30 qazannan 12 qarashaǵa deıin ótinishter qabyldandy. Jaldamaly baspana baǵdarlamasy aıasynda Alataý aýdanyndaǵy «Kókqaınar» yqshamaýdanynan bir bólmeli 249 páter beriledi.

Saıt arqyly elektrondyq formatta 1244 ótinish qabyldandy.

«Basqarma 10 kún ishinde upaılarǵa sáıkes sanaq júrgizedi. Jaldamaly páter beriletin jastardyń tizimi bekitiledi. Bul tizimge upaılardy esepteý kezinde ótinish berýshiniń kásibi, otbasylyq jaǵdaıy, jeke kásipkerlik qyzmeti, bıýdjettik qyzmetterde jumys isteýi, shottarynyń jınaqtary eskeriledi. Baldary teń jaǵdaıda ótinishti birinshi tapsyrǵan jastarǵa basymdyq beriledi. Osydan keıin saıtta úmitkerlerdiń tolyq tizimi jarııalanady. Alǵashqy 249 páterdi qarashanyń sońynda berýdi josparlap otyrmyz», - dedi Aıbek Saıdeldaev

Sonymen qatar, ol jumys isteıtin jastarǵa jaldamaly baspana 5 jylǵa beriletinin eske saldy. Osy kezeńnen keıin páter bosatylýy kerek.

«Erejege sáıkes, jas adamnyń turaqty jumys orny bolýy kerek. Sebebi, biz jastarǵa óz turǵyn úıin satyp alý úshin bastapqy jarna jınaýǵa múmkindik beremiz»,- dedi spıker.

Onyń aıtýynsha, bir bólmeli páterdi jalǵa alýshylar aıyna 5 myń teńgeden tóleıdi, kommýnaldyq qyzmetterge bólek tóleıdi.

«Jalpy, biz Almatyda jyl sońyna deıin 1050 páterdiń kiltin tabystaýdy josparalap otyrmyz», - dedi ol.