Almatylyq volonterler alǵys hatpen marapattaldy

ALMATY. QazAqparat – Volonter jylynyń resmı jabylý saltanaty aıasynda Almaty qalasynyń ákimi Baqytjan Saǵyntaev volonterler men jastar uıymdarynyń ókilderin marapattady, dep habarlaıdy QazAqparat tilshisi.

«Jyl tulǵasy» nomınatsııasy boıynsha «Jomart júrek» baıqaýynyń bas júldesin «Dıalstroı» JShS bas dırektory Ǵabıt Mamatraıymov jeńip aldy.

«Pedagogtar akademııasy» qoǵamdyq birlestiginiń jetekshisi Nurym Nurǵalıev, «LLider.kz» eriktiler qozǵalysynyń basshysy Dılmıra Blats jáne «QR Qyzyl Jarty Aı qoǵamy» jetekshisi Erkebek Arǵymbaev «Jyl volonteri» atandy.

Saltanatty shara barysynda ,birqatar eriktiler men volonterlik uıymdardyń ókilderi Elbasynyń jáne Prezıdenttiń alǵys hatymen marapattaldy.

Almaty qalasynyń ákimi Baqytjan Saǵyntaev almatylyqtardyń atynan volonterlerge qıyn kezde azamattarǵa kórsetken qamqorlyǵy men kómegi úshin rızashylyǵyn bildirip, alǵys aıtty.

Qazirgi tańda Almatyda 28 volonter uıymy jumys isteıdi. Onyń quramynda 50 myńnan astam volonter bar.