Almatylyq úleskerler: jańa turǵyn úı keshenindegi páterler ekinshi ret satylǵan
«Bostandyq aýdanynda «Lider Group» degen kompanııa jumys isteıdi. 2021 jyly «Ush-Qonyr» turǵyn úı kesheninen páter aldyq, qurylys salýshy bizge tikeleı satpaı, atalǵan kompanııaǵa jiberdi. Endi olar úıdi salǵan soń, paıdalanýǵa berý aktisi jasaldy. Biraq qurylys salýshy men «Lider Group» kompanııasy ózara kelisimdi buzdy, al biz, úleskerler, biz kóppiz, pátersiz qaldyq. Aqshamyzdy da qaıtarǵan joq», – dep shaǵymdandy almatylyq ákimge.
Taǵy bir úlesker 2022 jyldyń qazan aıynda polıtsııa qylmystyq is qozǵaǵanyn aıtty.
«Biz jábirlenýshi dep tanyldyq. Mine, eki aı ótti. Sizge júginip otyrmyz. Óıtkeni páterler ekinshi ret satylyp jatyr. Bizdiń páterler basqa adamdarǵa qaıta satylyp ketti. Jańa páter ıeleri jóndeý jumystaryn júrgizip jatyr», – deıdi qala turǵyny.
Óz kezeginde qala qurylysyn baqylaý basqarmasynyń basshysy bul nysannyń ótken jyldyń qyrkúıek aıynda paıdalanýǵa berilgenin aıtty. Úı zań aıasynda salynǵan.
Onyń aıtýynsha, úleskerlermen kelisim-shartty buzý jáne qaıta satý máseleleri paıdalanýǵa berilgennen keıin týyndaǵan.
Almaty qalalyq Polıtsııa departamentiniń bastyǵy Arystanǵanı Zapparov kompanııaǵa qatysty jeltoqsan aıynda qylmystyq is qozǵalǵanyn, búginde alaıaqtyq faktisi boıynsha tergeý júrip jatqanyn málim etti.
Sondaı-aq tergeý barysynda páterlerdi satýǵa tyıym salyndy.
Erbolat Dosaev aqpan aıynyń sońyna deıin protsesti tezdetip, isti sotqa jetkizý kerektigin atap ótti.
«Bul turǵyn úı kesheni Medeý aýdanynda ornalasqan. Bul máselemen biz aınalysyp jatyrmyz, Medeý aýdanynyń ákimi de biledi. Ókinishke oraı, mundaı faktiler bizde kóp. Endi qurylys salýshymen aınalysýymyz kerek. Sizdermen kelisim-shart jasaǵan Lider kompanııasynyń basshylaryn nemese quryltaıshylaryn izdeımiz, sosyn «Ush-Qonyrǵa» baramyz, basqa amal joq», - dedi qala basshysy.
Ákim óz orynbasary men basqarma basshysyna da oryn alyp otyrǵan jaǵdaımen shuǵyl túrde aınalysýdy tapsyrdy.