Almatylyq tutynýshylarǵa sapasyz taýarǵa tólegen 66 mln teńgesi qaıtaryldy

ALMATY. QazAqparat – Almatylyq tutynýshylarǵa sapasyz qyzmetter men taýarlar úshin 66 775 325 teńge qaıtaryldy. Bul – jyl basynan beri klıentterge kelgen shyǵyn kólemi, dep habarlaıdy QazAqparat tilshisi.

Almaty qalasynyń saýda jáne tutynýshylardyń quqyqtaryn qorǵaý departamentine 3 myńnan astam adam shaǵym túsirgen.

Bul jóninde búgin óńirlik kommýnıkatsııalar qyzmetiniń brıfınginde departament basshysynyń orynbasary Nurlybek Bımurzaev aıtty.

«2023 jyldyń alty aıynda kelip túsken ótinishter negizinde departament tutynýshylar quqyǵyn qorǵaý baǵyty boıynsha memlekettik baqylaý júrgizý barysynda 59 ákimshilik hattama jasady, onyń ishinde jospardan tys tekserýler nátıjesi boıynsha tutynýshylarǵa 66 775 325 teńge qaıtaryldy», - dedi ol.

Spıker Qazaqstanda 2020 jyldan bastap tutynýshylardyń shaǵymdaryn qaraýdyń kópsatyly júıesi jumys isteıtinin, onyń sheńberinde «memlekettik» jáne «qoǵamdyq» baqylaý engizilgenin, kásipqoılar arasynan quqyq qorǵaýshylardyń tizbesi jasalǵanyn eske saldy.

Bul mehanızm satýshy aldyndaǵy tutynýshylardyń shaǵymyna jaýap berý mindettemesin, tutynýshynyń quqyqtaryn qamtamasyz etý algorıtmin sol jerde jáne sol sátte qarastyrady.

«Birinshi kezeńde satýshy satyp alýshynyń talabyn óz betinshe nemese tutynýshylardyń quqyqtaryn qorǵaý jónindegi uıymdardy tarta otyryp qaraýǵa mindetti. Bul shaǵymdardy sol jerde jáne sol sátte beıbit jolmen sheshýge bolatyn alǵashqy kezeń. Bul jaǵdaıda úkimettik emes uıymdar daýdy sotqa deıingi retteý sýbektileri retinde áreket etedi. Ekinshi kezeń memlekettiń qosylýyn qamtıdy. ıAǵnı, eger satýshy kelisimge kelý nıeti bolmasa, shaǵym tutynýshylardyń quqyqtaryn qorǵaý komıtetine nemese basqa mamandandyrylǵan organǵa jiberiledi. Sotqa júginý - shyn máninde, shaǵymdy qaraýdyń sońǵy satysy», - dep tolyqtyrdy spıker.

Sonymen qatar, tutynýshylarǵa, bızneske jáne memlekettik organdarǵa yńǵaıly bolý úshin 2021 jyldyń 1 qańtarynan bastap e-tutynushy.kz shaǵymdardy qabyldaý men qaraýdyń biryńǵaı aqparattyq júıesi jumys isteıdi.

«Bul júıede tutynýshy shaǵymdy ártúrli tásildermen, sonyń ishinde mobıldi qosymsha arqyly berýge múmkindigi bar. Tutynýshynyń yńǵaılylyǵy úshin júıede daýdyń nysanasyna baılanysty shaǵymdardyń birqatar úlgilik nysandaryn ornalastyrý kózdeledi. Sondaı-aq, sotqa deıingi retteýdiń qoldanystaǵy ınstıtýttarynyń birin tańdaı alady nemese shaǵymdy tikeleı memlekettik organǵa jiberýine bolady», - deıdi departament ókili.