Almatylyq tutynýshylarǵa 164 mln teńge qaıtaryldy

ALMATY. QazAqparat- Almatyda 2022 jyly tutynýshylar quqyǵyn qorǵaý salasynda barlyǵy 4139 ótinish túsken. Turǵyndar tarapynan túsetin ótinishter jyl ótken saıyn kóbeıip keledi. Bul týraly Óńirlik kommýnıkatsııalar qyzmetiniń alańynda Almaty qalasy boıynsha Saýda jáne tutynýshylardyń quqyqtaryn qorǵaý departamenti basshysynyń orynbasary Nurlybek Bımyrzaev málim etti, dep habarlaıdy QazAqparat tilshisi.

Spıkerdiń sózinshe, byltyr departamentke eOtinish qosymshasyn paıdalana otyryp, 1852 ótinish túsken, onyń 2287-i elektrondy qujat aınalymy biryńǵaı júıesi boıynsha, 435-i basqa memlekettik organdar men Tutynýshylar quqyǵyn qorǵaý komıtetinen qaıta baǵyttalǵan.

2022 jyly 33 ákimshilik hattama toltyryldy, onyń 14-ne tekserý júrgizildi. Eskertý túrinde 27 aıyppul jáne altaýyna 50 AEK jáne 20 AEK mólsherinde aıyppul salyndy. Sonymen qatar, almatylyq tutynýshylarǵa 164 mln teńge qaıtaryldy.

Tutynýshylar quqyǵyn qorǵaý salasyn jaqsartý maqsatynda eki jyl buryn «Tutynýshylardyń quqyqtaryn qorǵaý týraly» Zańǵa ózgertýler men tolyqtyrýlar engizildi. Bul mańyzdy qadam tutynýshylardyń shaǵymdaryn qaraýdyń 3 satyly mehanızmin (satýshy – memlekettik organdar – sot) iske qosýǵa, «memlekettik» jáne «qoǵamdyq» baqylaýdy engizýge, kásibı mamandar arasynan quqyq qorǵaýshylardyń tizimin qalyptastyrýǵa kómektesti. Sonymen birge, daý-damaıdy sotqa deıingi tártipte retteý mehanızmi qaraldy.

«Sonymen, birinshi kezeńde satýshy satyp alýshynyń talabyn óz betinshe nemese tutynýshylardyń quqyqtaryn qorǵaý uıymdaryn tarta otyryp qaraýǵa mindetti. Bul shaǵymdardy osy jerde jáne qazir beıbit jolmen sheshýge bolatyn eń birinshi kezeń. Úkimettik emes uıymdar bul jaǵdaıda daýdy sotqa deıin retteý sýbektileri retinde áreket etedi. Ekinshi qadam memlekettiń qatysýyn qamtıdy. ıAǵnı, eger satýshy kelissóz júrgizgisi kelmese, shaǵym ne Tutynýshylardyń quqyqtaryn qorǵaý komıtetine, ne basqa mamandandyrylǵan organǵa jiberiledi. Mysaly, eger satýshy tarazyny burap jiberse nemese ınternet-dúken taýardy jibermese, bul kóbirek alaıaqtyqqa keledi jáne ol Іshki ister mınıstrliginiń jumys salasy bolyp tabylady», - dedi spıker.

Departament ókiliniń aıtýynsha, kásipkerler men úkimettik emes uıymdarǵa bul máseleni memleketti qatystyrmaı-aq sheshý múmkindigi beriledi. Sotqa shaǵymdaný, shyn máninde, shaǵymdy qaraýdyń sońǵy kezeńi.

«Júıeniń maqsaty – tutynýshylardyń quqyqtaryn qorǵaý jónindegi barlyq sharalardy bir jerge shoǵyrlandyrý, shaǵymdardy daıyndaý jáne olardy quzyrly organdarǵa joldaý rásimderin jeńildetý jáne arzandatý, sondaı-aq barlyq ótinishter men olardy qaraý nátıjelerin tsıfrlandyrý», - deıdi ol.

Sondaı-aq, ol búgingi kúni Qazaqstan Respýblıkasynyń Saýda jáne ıntegratsııa mınıstrligi shaǵymdardy qaraýdyń úsh satylydan eki satyly mehanızmge deıingi jańa mehanızmin ázirlep jatqanyn tilge tıek etti.

Onyń nátıjesinde tutynýshy satýshyǵa sotqa deıingi talap aryzyn jibergennen keıin ekinshi kezeńde sot organdaryna talap aryz bere alady.

Esterińizge sala keteıik, 15 naýryz - Dúnıejúzilik tutynýshylardyń quqyqtaryn qorǵaý kúni.