Almatylyq taksıst Italııa azamatyn qonaqúıge 45 myń teńgege jetkizgen

ALMATY. QazAqparat – Kólik polıtsııasy ıtalııalyq azamatshadan qonaqúıge jetkizgeni úshin 45 myń teńge alǵan almatylyq taksıstiń kim ekenin anyqtady, dep habarlaıdy QazAqparat tilshisi.

Kóliktegi polıtsııa departamentiniń málimetinshe, Italııadan kelgen azamatsha Almaty áýejaıynan qonaqúıge jetkizgeni úshin taksıske 45 myń teńge tólegen.

Departament bastyǵynyń birinshi orynbasary Madııar Aıtýǵanovtyń aıtýyna qaraǵanda, qala turǵynynan shetel azamatyn asa qymbat baǵamen jetkizip tastaǵan júrgizýshige shara qoldaný kerektigi týraly ótinish túsken.

Kóp ótpeı jedel izdestirý sharalary nátıje berip, jeke taksı qyzmetin kórsetip júrgen adamnyń kim ekeni anyqtalǵan.

«Bul Almaty oblysynyń 48 jastaǵy turǵyny bolyp shyqty. Er adam áýejaıdan Bógenbaı batyr kóshesindegi qonaqúıge deıin tym joǵary baǵa aıtyp, sheteldik azamatshany jańylystyrǵan. Quqyq buzýshyǵa Ákimshilik quqyq buzý týraly kodekstiń 449-baby 1-bóligi boıynsha shara qoldanyldy», - deıdi Madııar Aıtýǵanov.

Al Qaraǵandy qalasynda 53 jastaǵy er adamnyń temirjol bıletin satyp, bıleti joqtardy poıyzǵa mingizip, deldaldyq jasaǵany anyqtaldy.

«Ol buǵan deıin de osyndaı qylmysy úshin jaýapqa tartylǵan bolyp shyqty. Ákimshilik quqyq buzý týraly kodekstiń 449-baby 2-bóligi boıynsha 10 aılyq eseptik kórsetkish (31 800 teńge –red.) kóleminde aıyppul salyndy. Jyl basynan beri Kóliktegi polıtsııa departamentiniń mamandary túrli deńgeıde zań buzǵan 25 746 azamatty jaýapqa tartty», -dep jazylǵan departamenttiń dereginde.

Eske salsaq, mamyr aıynda qyz zorlaǵan oraldyq taksıst 8 jylǵa sottalǵan edi.