Almatylyq stýdentterdiń 54% ǵana jataqhanamen qamtylǵan

ASTANA. QazAqparat – Almatydaǵy stýdentterdiń 54 paıyzy ǵana tıisti jataqhanamen qamtamasyz etilgen. Mundaı derekterdi Ortalyq kommýnıkatsııalar qyzmetinde ótken brıfıng barysynda jýrnalısterdiń suraǵyna jaýap bergen Ǵylym jáne joǵary bilim vıtse-mınıstri Qýanysh Erǵalıev keltirdi, dep habarlaıdy QazAqparat tilshisi.

«Jalpy elimizdegi 119 ýnıversıtettiń 35-i Almaty qalasynda ornalasqan. Sonymen qosa, stýdentterdiń 3/1 Almatyda. Bir jaǵynan jataqhana máselesi de bolyp tur. Aqparatymyz boıynsha Almatydaǵy stýdentterdiń 54 paıyzy ǵana tıisti jataqhanamen qamtamasyz etilgen», - dep jaýap berdi Qýanysh Erǵalıev BAQ ókilderiniń suraǵyna oraı.

Buǵan deıin habarlaǵanymyzdaı, bıyl stýdentterge arnalǵan jataqhanalarda tólemaqy ósken. Osyǵan qatysty vedomstvo túsinik bergen bolatyn. Mınıstrlik dereginshe, jataqhana tólemaqysynyń ósýine bıylǵy jyly ǵımaratty kútip ustaý, qyzmet kórsetý shyǵyndary qunynyń kóterilýi sebep bolǵan.

Qosa keteıik, buǵan deıin jataqhana tapshylyǵy máselesin sheshý úshin mınıstrilik aǵymdaǵy jyly 6 jataqhana boı kóteretinin málimdep edi.

Foto: gadgetshelp.com