Almatylyq stýdent dombyra tartýdy úıretetin qosymsha oılap tapty

ASTANA. QazAqparat - Almaty qalasynda ornalasqan Súleımen Demırel atyndaǵy ýnıversıtettiń úshinshi kýrs stýdenti Qambar Nurlan dombyrany uıaly telefon arqyly úırenýge bolatyn «Dombra» mobıldik qosymshany jasap shyǵardy, dep habarlaıdy «QazAqparat» HAA tilshisi.

Dombyranyń mobıldik qosymshasyn oılap shyǵarý týraly bastama Qambardyń oıyna alǵash «EKSPO-2017» kórmesin aralap júrgen kezde kelgen.

«Alǵash Astanaǵa kelgen kezimde birden «EKSPO-2017» kórmesine bardym. Ol jerde álemniń túkpir-túkpirinen kelgen memlekettiń meımandary ózderiniń ulttyq qundylyqtaryn naqyshtarymen eń sońǵy tehnologııalarǵa úılestirip kórsetip jatty. Solardy kórgen kezde dombyrany nelikten jańa qyrynan kórsetpeske degen oıǵa keldim. Gıtaranyń, pıanıonyń mobıldik qosymshasy bar. Osyǵan uqsas dombyranyń búkil perneleriniń dybysyn alyp, mobıldik qosymsha qylyp shyǵardym», - deıdi Qambar Nurlan.
 

Qazirgi tańda «Dombra» mobıldik qosymshasyna «Erkem-aı», «Erke sylqym» jáne «Balbyraýyn» kúıleri engizilgen.

«Aldaǵy aptada osy úsh kúı qosymshanyń ishinde tolyq úırenýge bolatyndaı retteledi. Dombyrany tabıǵı túrde oınaǵandaı, taza dybys beredi. Qazirgisi erkin oınaýǵa bolatyn nusqasy. Baǵdaqrlamalaý salasynda eńbek etip júrgenimen eki jarym jyl bolyp qaldy. Aldaǵy ýaqytta ulttyq «Toǵyzqumalaq» oıynynyń mobıldik qosymshasyn jasap shyǵarýdy kózdep otyrmyn», - deıdi Qambar.
 

Aıta keteıik, Astana qalasyndaǵy Nazarbaev ýnıversıtetinde «nFactorial Demo Day 2017» festıvali ótip jatyr. Festıvalge kelgen qonaqtarǵa 100-ge jýyq mobıldi qosymsha kórsetildi.