Almatylyq polıtseı jappaı tártipsizdik kezinde áriptesine qalaı kómekteskenin aıtty

ALMATY. QazAqparat- Almatylyq ýchaskelik polıtsııa ınspektory kóptiń arasynan áriptesin alyp shyǵýǵa qalaı kómekteskenin aıtyp berdi, dep habarlaıdy QazAqparat tilshisi.

Bul – Medeý aýdandyq polıtsııa basqarmasy ÝPP-79 bóliminiń aǵa ýchaskelik ınspektory Ernar Áıtenov.

Ol 5 qańtar kúni kúndiz bolǵan tártipsizdik týraly egjeı-tegjeıli aıtyp berdi

Olar tańerteń Medeý aýdandyq polıtsııa basqarmasy basshylyǵynyń nusqaýymen qoǵamdyq tártip pen qaýipsizdikti qamtamasyz etý maqsatynda Tóle bı men Baıtursynov kósheleriniń qıylysyna jóneltilgen.

«Sherýshilermen qııan-keski qaqtyǵys kezinde kúshter Seıfýllın kóshesine yǵystyryldy. Bógenbaı batyr men Seıfýllın kósheleriniń qıylysynda polıtsııa qyzmetkerin ustap alǵan agressıvti er adamdardy baıqadym. Onyń úsheýi tutqynǵa alynǵan polıtsııa qyzmetkerin qıylystyń ortasyna aparyp, tizerletip otyrǵyzyp qoıyp, qorqytý maqsatynda qatty ura bastady. Bul áreketterdi kórgende shoshyp kettim, tipti, azdap eseńgirep qaldym. Alaıda, oıymdy tez jınaqtap, áriptesime kómektesýge umtyldym. Men olardy taratý úshin tike jınalǵandardyń arasyna qaraı júgirdim. Artymnan júgirip kele jatqan joldastarym, ustalǵan qyzmetkerdi qalqanmen jaýyp, alyp shyqty», – deıdi Áıtenov.

Onyń aıtýynsha, qutqarylǵan áriptesimen buryn tanys bolmaǵan. Qolǵa túsken polıtseı aýyr jaraqat alǵan jáne qazir emdelip jatyr.

«Men buryn-sońdy mundaı qatygezdikti kórgen emespin, adamdardyń mundaı áreketi meniń kóńilimdi qaldyrdy, biraq áskerı mindet pen ant bárinen joǵary. Barlyǵy men sııaqty áreket etetinine senimdimin», – dep túıindedi quqyq qorǵaý organynyń qyzmetkeri.

Ernar Áıtenov – ІІM Almaty akademııasynyń túlegi. Qazir ol 15 myń turǵyny bar «Samal» yqshamaýdanynda tártipti kúzetedi.

Inspektor bul qıyn-qystaý kúnderi ata-anasynyń ol úshin qatty alańdaǵanyn aıtty. Sondaı-aq, Ernar – otbasyndaǵy jalǵyz bala.