Almatylyq polıtseı qańtar oqıǵasynda basynan ótken oqıǵany aıtty

ALMATY. QazAqparat - Almaty qalasynyń Túrksib aýdandyq polıtsııa basqarmasynyń patrýldik polıtsııa polkiniń ınspektory qańtar oqıǵasy kezindegi buzaqylardyń áreketin sıpattap berdi, dep habarlaıdy QazAqparat tilshisi.

Patrýldik polıtsııa polkiniń ınspektory Rýfan Ragımovtyń aıtýynsha, top adam tártip saqshylaryn soqqynyń astyna alǵan. Ózderiniń kóptigin paıdalanyp, tas, armatýra laqtyryp, kúsh kórsetken.

«Polıtseılerdiń bir toby Seıfýllın kóshesi boıymen ońtústik jaqqa, ereýildeýshilerge qaraı bet alady. Al ereýildeýshiler Tımırıazev kóshesimen shyǵysqa qaraı bet alǵan. Sol sátte eki jaq bir-birimen kezdesip qaldy. Búlikshilerdiń qolynda tas, armatýra, temirler boldy. Olar tas laqtyrǵanda basymyzdaǵy kaskaǵa deıin ushty», – dep eske aldy ol.

Qatty soqqydan polıtsııa qyzmetkerleriniń arasynda talyp qalǵandar da bolǵan.

«Shamamen 500-800-deı adam boldy. Olar óte kóp edi. Biz olardy dúrbeleń bolmasyn dep, taratyp jiberýge tyrystyq. Adamdar bizge kúsh kórsetip, shabýyl jasaıdy dep oılamadyq. Eshkim sózge toqtamady», – dedi Rýfan Ragımov.