Almatylyq órt sóndirýshiler oqıǵa ornyna mototsıklmen baryp júr

ALMATY. QazAqparat - Almaty turǵyndary órt sóndirý úshin kóz úırengen alyp mashına emes, mototsıklshilerdiń kelip jatqanyna ań-tań bolyp júr, dep habarlaıdy «QazAqparat» HAA tilshisi.

14 qazanda Mamyr-4 yqshamaýdanyndaǵy 293-úıdiń turǵyndary kóp qabatty úıdiń kireberisinde býdaqtaǵan tútin saldarynan «101-ge» habarlasady. Aldymen jetkender mototsıkl mingen TJ qyzmetkerleri boldy. Kele sala qolma-qol jumysyna kirisip te ketti. Feısbýkte Aleksandr Klımanov esimdi azamattyń aıtýynsha, 7 mınýtta kelgen «shaǵyn brıgada» órtti sóndirip tastaǵanyna jurt alǵysyn da bildirgen.

Almaty TJD resmı ókili Sandýǵash Baımuhambetova órt habaryna alǵash attanǵan mototsıkl ekıpajy bolǵanyn rastady. Onyń aıtýynsha, úı aldyndaǵy qoqystyń órtenýi kireberisti tútinge tunshyqtyrǵan. Aspaly órt sóndirgish quraldarymen jabdyqtalǵan mototsıklshiler ony 18:14-te sóndiredi. Kishigirim órt apattaryna baratyn ekıpaj músheleri qajet bolǵanda adamdardy da qutqara alady, oǵan qajetti barlyq qural-saımany bar. «Bul pılottyq joba, Qazaqstannyń basqa jerinde mundaı joq. Mototsıklderdi 40,4 mıllıon teńgege satyp aldyq», - dep jazady Sandýǵash Baımuhambetova.

Statıstıkaǵa sensek, mototsıkl ekıpajy bıylǵy jeti aıdyń ishinde 50 ret «joryqqa» shyqqan. Al 9 aıda Almaty órt sóndirýshileri 2692 órtti sóndirýine týra kelgen.