Almatylyq oqýshy úsh jyl qatarynan Jáýtikov olımpıadasynyń altyn medalin jeńip aldy

ALMATY. QazAqparat - Úshinshi ret qatarynan halyqaralyq Jáýtikov olımpıadasynyń altyn medalin Almatydaǵy fızıka-matematıka baǵytyndaǵy zııatkerlik mekteptiń oqýshysy Taır Satýbaldın jeńip alyp, matematıkter arasynda úzdik atandy, dep habarlaıdy QahAqparat tilshisi.

Kóptegen olımpıadalardyń jeńimpazy men júldegeri atanyp júrgen Taır 5 jasynan esep shyǵara bilgen.

Bahyt Arhıpqyzy esimdi kútýshisi kishkentaı Taırdyń matematıkaǵa degen súıispenshiligin oıatqan.

Al mektep tabaldyryǵyn attaǵan soń, matematıka eń qyzyqty pánderiniń birine aınalǵan.

Daryndy bala 7-synyptan bastap Halyqaralyq jarystarda baq synaǵan.

Búginde qorjynynda 20-ǵa jýyq jeńisi bar.

Byltyr Taırǵa Astana IT ýnıversıteti tegin oqýǵa grant usynsa, búginde Hong Kong University of Science and Technology joǵarǵy oqý ornynda bilim alýǵa múmkindigi bar.

Jalpy ózi AQSh-taǵy Massachusetts Institute of Technology ýnıversıtetinde oqýdy kózdep otyr.

Onyń aıtýynsha, ol onda bilim alýyna baryn salmaq.

«Sózdiń shyny kerek men Halyqaralyq jarysqa daıyndalmaı baryp, altyn medal ıegeri atandym. Maǵan I – kezeń II- kezeńge qaraǵanda qıyndaý soqty. Máselen, men birinshi týrǵa 4,5 saǵatym ketse, al ekinshi týrǵa 3 saǵat ýaqytym jumsaldy. Endi aldaǵy ómirimdi joǵary matematıkamen baılanystyryǵym keledi. Josparlar kóp»,-deıdi Taır Satýbaldın.

Halyqaralyq Jáýtikov olımpıadasy-ınformatıka, fızıka jáne matematıka pánderi boıynsha 10-12 synyp oqýshylaryna arnalǵan jyl saıynǵy jarys.

Bıyl tartysty dodaǵa álemniń 21 elinen 1178 oqýshy qatysqan. Jalpy olımpıada 2005 jyldan beri Qazaqstanda ótkizilip keledi.

Onlaın formatta ekinshi ret uıymdastyrylyp otyr.