Almatylyq oqýshy qala tarıhymen tanystyratyn mobıldik qosymsha jasady

ALMATY. QazAqparat - Almaty qalasyndaǵy №15 gımnazııanyń oqýshysy Tımýr Qyrbasov ólkeniń tarıhyn zertteýge arnalǵan biregeı qosymsha oılap tapty. Bul týraly Oqý-aǵartý mınıstrliginen málim etti, dep habarlaıdy QazAqparat tilshisi.

Oqý-aǵartý mınıstrliginiń málimetinshe, baǵdarlama kóshe nemese aıaldamaǵa jaqyndaǵan kezde avtomatty túrde nysan týraly paıdaly, tanymdyq tarıhı aqparat beredi.

Avtordyń aıtýynsha, bul qalany jaqsy bilgisi keletinderge taptyrmas múmkindik ári jas býynnyń tarıhqa degen qyzyǵýshylyǵyn arttyrady.

«Men ázirlegen mobıldik qosymshany paıdalanýshy kósheni kesip ótken sátte kóshege qatysty nemese sol jerdegi nysandar týraly aqparat beredi. Jobanyń maqsaty – oqýshylarǵa el tarıhyn kúndelikti ómirde zertteýge kómektesý. Tarıhty bilý óte mańyzdy dep sanaımyn», - dedi Tımýr Qyrbasov.

Mobıldik qosymshany Google Play jáne App Store arqyly júktep alýǵa bolady.

Aıta keteıik, bul oqýshynyń Almaty men týǵan ólkeniń tarıhyn zertteýdi nasıhattaıtyn jalǵyz ıdeıasy emes. Ol qoǵamdyq kólikte aıaldamany habarlaǵan kezde oǵan qysqasha tarıhı aqparat qosýdy usynady.

Tımýr qazirdiń ózinde úsh avtorlyq quqyqtyń ıesi. Sońǵy úsh jylda halyqaralyq jáne respýblıkalyq ǵylymı jobalar baıqaýynda jeńiske jetti. 2023 jyly «Jyl oqýshysy» atandy.