Almatylyq oqýshy balalarǵa tegin aǵylshyn tilin úıretetin onlaın mektep ashty

ALMATY. QazAqparat – Búginde karantın jaǵdaıyna baılanysty oqý, jumys jáne basqa sharalardyń barlyǵy onlaın formatqa kóshirildi. ıAǵnı úıden jumys istep, úıde oqıtyn kezeń bul. Karantındi sátti paıdalanyp, óz ıdeıasyn júzege asyrǵandardyń biri almatylyq oqýshy Ilıa Kan. Ol ıgi sharany qolǵa alyp az qamtylǵan otbasydan shyqqan, dárigerler men polıtseılerdiń balalaryna tegin aǵylshyn tilin úıretýde. Sol úshin de arnaıy onlaın mektep ashqan. «Teaching for heroes» jobasynyń avtory QazAqparat tilshisine suhbat berip, jaqynda qolǵa alynǵan áleýmettik jobanyń qalaı júzege asyrylyp jatqandyǵy týraly aıtyp berdi.

«Meniń jasym 16-da. Bos ýaqytymda oqyǵandy, jazǵandy unatamyn, sol sııaqty mektepte fýtbol oınaımyn. Men qazir AQSh-ta oqımyn, bıyl 11 synypqa óttim. Bolashaq mamandyqqa qatysty áli naqty tańdaý jasaǵan joqpyn. Degenmen joǵary bilimdi de osy AQSh-ta jalǵastyrmaq oıym bar. Bastapqy kezde ózim de til úıretip, sabaq berdim. Qazir kóbinese uıymdastyrýshylyq jumystarmen aınalysamyn. Búginde bizdiń onlaın mektepte 2 myńnan astam bala jáne jetkinshek aǵylshyn tili kýrsynan ótip, bilim alýda. Onyń ishinde jobamen 100-200 qatysýshy az qamtylǵan otbasynyń balalary. Aǵylshyn tilin meńgeremin degen nıetti balalarmen 900-ge jýyq oqytýshy óz tájirıbesimen bólisýde», - dedi I. Kan.

Sondaı-aq, joba avtory onlaın mektepti ashýdyń alǵashqy sátinde qıyndyqtardyń kezdeskenin de jasyrmady.

«Bul joba komandalyq jumys. Bizde ózimizdiń Whatsapp jelisinde tobymyz bar, sol jerde jumys barysy men oǵan qatysty ıdeıalardy birge talqylaımyz. Ol jerde maǵan kómektesýshi dostarym, til úıretýshi mamandar bar. Onlaın mektebimiz alǵash jumys isteı bastaǵanda birneshe qıyndyqtar boldy. Atap aıtqanda, kóbisi onlaın platformaǵa qalaı qosylý kerektigin bilmedi, odan soń kýrsqa qalaı jáne kimderge jazylýǵa bolady degen suraqtar jıi týyndady. Ýaqyt ótip jumys isteı kele, atalǵan máseleler óz sheshimin tapty. Jobanyń ashylǵanyna bir aı da bolǵan joq, degenmen rahmetin aıtyp, rızashylyǵyn bildirýshilerdiń sany óte kóp. Onyń ishinde balalarmen qatar olardyń ata-analary da bar. Til úıretýshi mamandar da munyń kerek joba ekenin aıtýda. Ásirese qatysýshy balalardyń ár sabaqty asyǵa kútetini qýantady. Onyń ústinde bizdiń til úıretý formatymyz ádettegideı lektsııa túrinde emes. Biz ár balanyń ereksheligi men qabiletine qaraı jeke túrde oqý formatyn ázirlep, úıretemiz», - deıdi ol.

Onyń aıtýynsha, eń bastysy - balalardyń rıza bolýy men til úırenýge degen qabileti.

«Taǵy bir aıtyp ótetin erekshe sát, bul balalar men jetkinshekterge tek qana aǵylshyn tilin úıretetin onlaın mektep emes. Bul áleýmettik joba, bizdiń maqsat – ortaq qyzyǵýshylyǵy bar balalardyń basyn biriktirý. Óz ıdeıalaryn júzege asyrǵysy keletin balalarǵa baǵyt-baǵdar kórsetip, múmkindiginshe aqyl-keńes berý. Aǵylshyn tili úırený kýrsyna qalaı jazylýǵa bolady degen saýaldar da túsip jatyr. Olarǵa aıtarym, basty talap qatysýshynyń az qamtylǵan otbasylardyń, dárigerlerdiń, polıtseılerdiń otbasynan bolǵany abzal. Degenmen osy kúnge deıin eshqandaı qatysýshynyń betin qaıtarǵan emespiz», - dedi almatylyq jetkenshik.

Ilıa Kannyń málimdeýinshe, til úırengisi keletinderdiń arasynda qazaqstandyq balalardan bólek, alys-jaqyn shetelden de nıettiler bar.

«Sabaq beretin mamandardyń quramy óte myqty, bizdiń jobamyz týraly estigen álemge áıgili ýnıversıtetterdiń ustazdary da qol ushyn sozýda. Oqytýshylardyń keıbirin men ózim shaqyrdym, al qalǵandary osy joba týraly ınternetten bilip, ózderi ynta bildirdi. Oqýshylardyń qatarynda Qazaqstannan bólek, Reseı, Ázerbaıjan jáne Armenııadan bar. Óz elimizden kóp ótinim bildirýshi Almaty jáne Nur-Sultan qalasynan bolyp otyr», - dedi ol.

Odan bólek, onlaın mektepti uıymdastyrýshy jerlesimiz balalardy irikteý protsesiniń qalaı ótetini týraly aıtyp berdi.

«Til úırenemin degen árbir nıettenýshi aldymen saýalnamany toltyrady. Ol jerde qandaı otbasydan shyqqany, jasy men basqa da derekter suralady. Eger bizdiń talaptarǵa saı kelse ol qabyldanady. Degenmen bala til úırenýge qushtar bolyp, biraq bizdiń talaptarǵa sáıkes kelmese, mysaly ol dárigerdiń emes muǵalimniń balasy bolýy múmkin, ondaı jaǵdaıda biz bas tartpaı oqýǵa qabyldaımyz. ıAǵnı úırenemin degen yntasy bar balaǵa esik ashyq. Sabaq ár balamen jeke túrde ótedi. Alǵashqy ýaqytta 6 sabaq ótedi, sodan soń balanyń yntasy men til meńgerý deńgeıine qaraı jalǵasa beredi. Kýrs 1 aıdan, 1 jylǵa deıin sozylýy múmkin, ony oqýshy men oqytýshy ózara sheshedi», - dedi I. Kan.

Sóz sońynda ıdeıa avtory atalǵan jobany karantın kezinde ǵana emes, odan ári jalǵastyryp damytý jospary baryn aıtty.