Almatylyq medıtsına uıymdaryna 80,2 mlrd teńge tólendi

ALMATY. QazAqparat - Memlekettik tapsyrys sheńberinde almatylyqtarǵa tegin qyzmet kórsetken medıtsına uıymdaryna 80,2 mlrd teńgege jýyq qarjy tólendi. Bul týraly «Áleýmettik medıtsınalyq saqtandyrý qory» KEAQ Almaty fılıaly málimdedi, dep habarlaıdy QazAqparat tilshisi.

«Bul qarajat memlekettik tapsyrys boıynsha kórsetilip jatqan tegin medıtsınalyq kómek úshin tólenip otyr. Saqtandyrý paketi sheńberinde qyzmet kórsetý 2020 jyly bastalady», – dedi MSQ Almaty fılıaly dırektory Tileýhan Ábildaev.

Jalpy, Almaty qalasynda 178 medıtsına uıymy Medıtsınalyq saqtandyrý qorymen memlekettik tapsyrysty oryndaý jóninde kelisimshart jasaǵan. Onyń basym bóligi – jeke menshik emhanalar. 2019 jylǵa bekitilgen kelisimsharttyń jalpy somasy 116,8 mlrd teńgeden asady.

Esterińizge sala ketsek, Medıtsınalyq saqtandyrý qory 2018 jyldan beri memlekettik bıýdjetten qarjylandyrylatyn kepildendirilgen tegin kómek paketiniń operatory. 2020 jyldan bastap qor mindetti áleýmettik medıtsınalyq saqtandyrý sheńberinde kórsetiletin qyzmetterdiń aqysyn tóleı bastamaq.