Almatylyq qutqarýshylar kóktemgi sý tasqynyna daıyndalyp jatyr
Tótenshe jaǵdaılar mınıstrligi málim etkendeı, almatylyq qutqarýshylar kóktemgi sý tasqynyna daıyndyq júrgizýde. Barlyq tehnıka, jeke quram yqtımal sý tasqyny kezindegi jedel jumysqa daıyn. Qutqarýshylar aýa raıynyń tosyn minezin eskerip, «Qazgıdromet» meteorologtarymen jáne «Kazseldenqorǵaý» mamandarymen únemi baılanysta.
Almaty qalasy Tótenshe jaǵdaılardyń aldyn alý basqarmasynyń basshysy Almat Janyspaevtyń aıtýynsha, qazirgi tańda aýdan ákimdikteri aryqtar men ózen arnalaryn qar men muzdan tazartý jumystaryn qarqyndy júrgizip jatyr. Aryq júıesiniń jalpy uzyndyǵy 1300 shaqyrymnan asady. Búgingi tańda 460 shaqyrymnan astam jer tazartyldy.
«2023 jylǵy sý tasqyny kezeńinde Almaty qalasy turǵyndarynyń qaýipsizdigin qamtamasyz etý maqsatynda Tótenshe jaǵdaılar mınıstrliginiń aýmaqtyq bólimsheleri men Almaty qalasynyń azamattyq qorǵaý qyzmetteriniń kúshteri men quraldarynyń jalpy sany 1609 adam bar, ártúrli maqsattaǵy 618 birlik tehnıka, 85 motopompa, sonymen qatar 99 birlik avtonomdy elektr stantsııasy bar», - dedi Almaty qalasy Tótenshe jaǵdaılar departamentiniń ókili.
Aıtýynsha, júıeli monıtorıngti uıymdastyrý jáne sý tasqynynyń saldaryn aldyn alý jáne sý basý zardaptaryn joıý sharalaryn ázirleý maqsatynda múddeli memlekettik organdarmen birlesip komıssııalyq zertteý júrgizilip, onyń barysynda sý basý qaýpi bar 102 aýmaq anyqtaldy.
«Búgingi tańda 62 mekenjaıda kanal jelilerin qaıta jańartý jáne salý jumystary aıaqtaldy, bul 49 ýchaskedegi qaýip-qaterdi joıýǵa múmkindik berdi. Qazirgi ýaqytta 7 ýchaskede qurylys-montaj jumystary júrgizilýde, olar osy jyldyń naýryz aıynyń sońyna deıin aıaqtalady», - dedi ol.