Almatylyq qusbegi «Qansonar – 2020» týrnıriniń bas júldesin jeńip aldy
Eske sala keteıik, osyǵan deıin habarlaǵanymyzdaı, Býrabaıda Qazaqstan, Majarstan, Mońǵolııa, Qyrǵyzstan jáne Reseı elderinen kelgen 45 saıatshynyń qatysýymen «Qansonar – 2020» halyqaralyq týrnıri uıymdastyryldy.
Qazaqstan Respýblıkasy Táýelsizdiginiń 28 jyldyǵy jáne ataqty búrkitshi Másip Batyrhanovty eske alýǵa arnalǵan týrnır «Búrkitpen ań aýlaý», «Suńqarmen ań aýlaý» jáne «Qarshyǵamen ań aýlaý» sııaqty úsh baǵytta órbidi. Aldymen jas balalar suńqar men qarshyǵany qolǵa qondyrsa, úlkender búrkitpen ań aýlap, ózara baq synasty.
Atadan mura bolyp qalǵan bul ulttyq sport dodasynda baq synasqan saıatshylardyń arasynda osyǵan deıingi jarystarda talaı márte jeńiske jetken, ulttyq ónerdi ulyqtaýǵa óziniń úlesin qosyp kele jatqan Birjan sal aýdanynan kelgen Qanat Shúlenbaev pen Abylaı Іzbasov jáne kókshetaýlyq Rýslan Tımýrzın sııaqty tájirbıeli qusbegiler jastarǵa osy bir isimen úlgi-ónege kórsete bildi.
Jarys qorytyndysy boıynsha Almaty oblysynan kelgen qusbegi Seıitjan Almas eń úzdik tanylyp, týrnırdiń bas júldesi – «Nıva» avtokóligin ıelendi. Ekinshi oryn Nur-Sultan qalasynan kelgen Kúntýǵan Serikbekke, úshinshi oryn Jambyl oblysynyń búrkitshisi Aıazbek Nurtórege berildi.
Al, qarshyǵa salýda júldeli birinshi Jambyl oblysynyń qusbegi Babajan Berikbolsyn alsa, ekinshi jáne úshinshi oryndardy Almaty oblysynyń sportshysy Baıetbaı Ómirhan men elordalyq Erasyl Serikbekuly ózara bólisti. Suńqar baptaǵan saıatshylar arasynda Almaty oblysynyń qusbegi Erlan Kenjetaev birinshi, jerlesimiz Medet Shálipov ekinshi, atyraýlyq Arman Qoshqarov úshinshi orynǵa laıyq dep tanyldy.