Almatylyq kedenshiler Irannan kontrabandalyq jolmen taýar jetkizýdiń «kestesin» áshkereledi

ALMATY. 20 aqpan. QazAqparat - Almaty qalalyq Kedendik baqylaý departamenti jyl basynan beri ekonomıkalyq kontrabanda boıynsha 8 qylmystyq is qozǵap, keden zańnamasyn buzǵan ártúrli faktiler, ákimshilik quqyq buzýshylyqtar boıynsha 197 is qozǵady.

Al 2012 jyly quqyq buzýshylyqtardy anyqtaý, aldyn alý, joıýǵa baǵyttalǵan jumystyń qorytyndysy boıynsha departament tarapynan 75 qylmystyq, 1046 ákimshilik is qozǵalǵan bolatyn.

Sondaı qylmystyń bir ushyǵy Iran Islam Respýblıkasynan taýar tıelip kelgen konteınerden shyqty. Onda Qazaqstannyń kedendik shekarasyn kesip ótý barysynda toltyrylǵan taýar tasymaldaý qujattary men tranzıttik deklaratsııada, syrtqy ekonomıkalyq qyzmet qatysýshysy tarapynan jalpy quny 30 myń AQSh dollaryn quraıtyn halyq tutynatyn taýarlar kórsetilgen. Biraq almatylyq kedenshiler ózderindegi aqparat boıynsha, konteınerdegi júkke tekserý júrgizip, deklaratsııadan ótpegen taýarlar, atap aıtqanda, kólik magnıtolalary, akýstıkalyq júıeler jáne kólikke arnalǵan bólshekterdi tapty. Qazir esep júrgizý arqyly olardyń quny men sany anyqtalyp jatyr.

Jedel sharalardy júrgizý barysynda kontrabandalyq taýarlar tıelgen 10 konteıner áshkerelendi. Bárinde de kedendik tólemder men salyqtardy tóleýden jaltarýǵa áreket jasalǵan. Qazirgi tańda bul faktiler boıynsha Kedendik baqylaý departamenti tarapynan aldyn ala tergeýge deıingi tekseris júrgizilip, qylmystyq isterdi qozǵaý jóninde máseleler qaralýda.