Almatylyq dárigerler shala týǵan nárestege kúrdeli operatsııa jasady

ALMATY. QazAqparat - Balalarǵa shuǵyl medıtsınalyq kómek kórsetý ortalyǵynyń dárigerleri jańa týǵan nárestege kúrdeli operatsııa jasady. Oń jaq qoltyǵyndaǵy týabitken isikti alyp tastady, dep habarlaıdy QazAqparat tilshisi.

Almaty qalalyq qoǵamdyq densaýlyq saqtaý basqarmasynyń málimetinshe, bala dúnıege merziminen buryn kelgen.

Týabitken isik oń jaq qoltyq asty aımaqta paıda boldy.

Dárigerler tynys alý jáne júrek-qan tamyrlary jetkiliksizdigi, I dárejeli qan aınalymynyń buzylýy dıagnozyn qoıdy.

Aǵza júıeleriniń qalypty jumys isteýine lınfangıoma kedergi keltirdi.

Týǵan kezde balanyń jaǵdaıy óte aýyr dep baǵalandy, neonataldyq brıgadanyń kómegimen perzenthanadan Almaty qalasyndaǵy balalar shuǵyl medıtsınalyq kómek ortalyǵyna jetkizildi.

Dárigerler eki apta boıy náresteniń ómiri úshin kúresti.

«Dıagnoz - oń jaqtaǵy qoltyq asty aımaǵynyń úlken lımfangıomasy, kólemi 12 de 17 sm. Merziminen buryn, 34-shi aptada týdy. Ortalyqqa ókpeni jasandy jeldetý apparatymen jetkizildi. Balany tolyq daıyndaǵannan keıin biz lımfa qurylymyn tilý úshin operatsııa jasadyq. Operatsııa 75 mınýtqa sozyldy. Ota sátti ótti, náreste saýyǵyp, statsıonardan shyǵaryldy», - dep túsindirdi Almaty qalasy balalar shuǵyl medıtsınalyq kómek ortalyǵynyń balalar hırýrgy Jalǵas Kúnııazov.

Lımfangıoma - júktiliktiń II trımestrinde paıda bolatyn lıfma tamyrlarynan turatyn qatersiz isik.

Kólemi úlken bola tura, isik densaýlyqqa qaýipti jaǵdaılardy týdyrýy múmkin. Ýaqtyly alyp tastaý oń boljam jasaýǵa múmkindik beredi.