Almatylyq dárigerler qańtarda 1,77 mlrd teńge kóleminde ústemeaqy aldy

ALMATY. QazAqparat - 2021 jyldyń qańtar aıynda Almaty qalasynda epıdemııaǵa qarsy kúreske jumyldyrylǵan medıtsına qyzmetkerleri 1,77 mlrd teńge kóleminde ústemeaqy aldy. Bul týraly «Áleýmettik medıtsınalyq saqtandyrý qory» KEAQ Almaty fılıaly málimdedi, dep habarlaıdy QazAqparat tilshisi.

Fılıal basshysy Tileýhan Ábildaevtyń aıtýynsha, jyldyń alǵashqy aıynda:

Birinshi qaýip tobyna kiretin qyzmetkerlerge – 877 mln teńge (barlyǵy 1504 adam);

Ekinshi qaýip tobyna kiretin qyzmetkerlerge – 644,7 mln teńge (barlyǵy 1916 adam);

Úshinshi qaýip tobyna kiretin qyzmetkerlerge 254,4 mln teńge (1567 adam) tólendi.

Buǵan deıin habarlanǵandaı, pandemııa bastalǵan 2020 jyldyń naýryzynan beri MSQ koronavırýs pen pnevmonııaǵa qarsy kúresip jatqan medıtsına qyzmetkerlerine ústemaqy tóleı bastaǵan bolatyn.

«Almaty qalasy boıynsha ótken jyldyń naýryz-jeltoqsany aralyǵynda koronavırýsqa shaldyqqan syrqattardy emdeýge 7,3 mlrd teńge bólindi. 165 myń adam PTsR-test tapsyrǵan, oǵan 1,8 mlrd teńge qarastyryldy. Medıtsına qyzmetkerlerine jalaqyǵa qosymsha aqy retinde 16,7 mlrd teńge tólendi», - dedi Tileýhan Ábildaev.

Esterińizge sala ketsek, Qazaqstanda koronavırýs pen pnevmonııaǵa shaldyqqan naýqastar tegin emdeledi, ol úshin saqtandyrylǵan bolý shart emes. Sonymen qatar, patsıentter COVID-19 juqtyrǵan jaǵdaıda mobıldi brıgadalar men úı jaǵdaıyndaǵy statsıonar qyzmetin paıdalana alady.