Almatylyq dárigerler gemorroı aýrýyn shaǵyn ınvazıvti zamanaýı ádispen emdeıdi
Almaty qalalyq №7 klınıkalyq aýrýhananyń baspasóz qyzmetiniń málimetinshe, 47 jastaǵy patsıenttiń gemorroımen aýyrǵanyna shamamen on jyl bolǵan.
«Bosanǵan kezde paıda bolǵan aýrýdyń asqynǵany sonshalyq, sońǵy kezde úlken dáretke otyrý úlken problemaǵa aınalǵan. Jetinshi aýrýhananyń koloproktologııa bólimshesiniń mamandary oǵan 3-dárejeli gemorroı degen dıagnozyn qoıdy. Epıdýraldy jansyzdandyrý arqyly tik ishekke Longo operatsııasy jasaldy. Zamanaýı apparattyń kómegimen jasalǵan ota sátti ótti. Patsıent úshinshi kúni aýrýhanadan shyqty. Sebebi, shaǵyn ınvazıvti ota orny dástúrli operatsııaǵa qaraǵanda tez jazylady, aýyrsyný sezimi de áldeqaıda tómen bolady. Naýqastar ekinshi kúni aıaqqa turyp ketedi. Jalpy, mundaı otadan soń naýqastyń densaýlyǵy 7-8 kúnde qalypqa keledi», - dep habarlady aýrýhananyń baspasóz qyzmeti.
Ota mindetti áleýmettik medıtsınalyq saqtandyrý paketi sheńberinde jasaldy.
№7 aýrýhananyń koloproktologııa bóliminiń meńgerýshisi Marat Kalenbaevtyń aıtýynsha, Longo operatsııasy gemorroıdyń III jáne IV-shi satysynda qoldanylady.
«Ol tikishektiń anatomııalyq qurylymyn qalpyna keltirýge múmkindik beredi. Bul ádisti qoldanǵanda zaqymdanǵan ishekter kesip alynbaı, kerisinshe joǵary qaraı tartylady. Іshektegi shyryshty qabyqtyń gemorroı túıinderinen joǵary ornalasqan bóligin kesip alyp tastaǵan soń, túıinder ózdiginen túsip qalady», - dedi Marat Kalenbaev.
Dáriger sondaı-aq gemorroı búgingi kúni keń taralǵan aýrý túrine jatatynyn aıtty.
«Dáriger kómegine ýaqytynda júginý kerek jáne bul máseleni óz betinshe sheshýge bolmaıdy. Ózin - ózi emdeýdiń nátıjesi aýrýdyń asqynýynan ákelýi múmkin, - dep eskertti dáriger.
Syrqattan jazylǵan áıel baqyt syılaǵan, jumys isteýge, adamsha ómir súrýge múmkindik bergen aq halatty jandarǵa alǵys aıtty.