Almatylyq dárigerler ekijaqty pnevmonııamen týǵan náresteni aman alyp qaldy

ALMATY. QazAqparat – Almaty qalalyq №4 perzenthanasynyń neonatolog dárigerleri ekijaqty ókpe qabynýymen týǵan náresteni qutqaryp qaldy, dep habarlaıdy QazAqparat tilshisi.

Almaty qalalyq densaýlyq saqtaý basqarmasynyń málimetinshe, ul bala ótkir ottegi jetispeýshiligi belgilerimen týdy. Neonatolog dárigerler sábıdiń dem alýyn qalypqa keltirý úshin shuǵyl reanımatsııalyq áreketterge kóshti. Alaıda tynys alýdy tolyǵymen qalpyna keltirý múmkin bolmady. Oǵan sebep – sábı ókpesiniń eki jaqty qabynýy.

«Náreste ózdiginen durys tynys ala almaǵandyqtan jańa týǵan sábılerge arnalǵan qarqyndy terapııa jaǵdaıynda, ókpeni jasandy jeldetý apparatyna qosyldy», - deıdi №4 perzenthananyń balalar bóliminiń meńgerýshisi Olga Kýdrıavtseva.

Keıin anyqtalǵandaı, qursaqishilik tynys alý jetispeýshiligi júkti kezinde anasynyń ınfektsııasy balaǵa juqqan.

«Ol óz betinshe eme almaǵandyqtan, ómir súrý qalpyn saqtaý úshin qorektik zattar tamyr arqyly jiberildi. Bala uzaq ýaqyt boıy dárilik uıqyda bolyp ózdiginen dem ala almady. Ókpe men ishektegi qabyný protsesteri qaıtqannan keıin, tynys alýy birtindep qalypqa kele bastady», - dedi Olga Kýdrıavtseva.

Onyń aıtýynsha, balanyń jaǵdaıy aýyr dep baǵalanǵan. Anasyna psıhologııalyq qoldaý kórsetildi.

«Jaǵdaıy aýyr balalardy emdeý kezinde bizge ata-ananyń senim artýy mańyzdy. Bul kóbine emniń sátti bolýyna kómektesedi. Infektsııany jeńip shyǵýǵa anasynyń dárigerlerge degen senimi men úmiti oń yqpal etti», - dep atap ótti ol.

Dárigerler balanyń aıy kúnine jetip týǵanyn tilge tıek etti. Onyń salmaǵy – 3,3 keli, boıy 53 sm boldy.