Almatylyq dárigerler 22 lıtr qan tapsyrdy
Aýrýhana baspasóz qyzmeti málim etkendeı, donor kúnine atalǵan medıtsına mekemesiniń 62 qyzmetkeri qan tapsyrýǵa nıet bildirgen, onyń 15-i medıtsınalyq kórsetkishterge baılanysty qan tapsyra almady.
«Osylaısha 47 qyzmetker barlyǵy 22 lıtr qan tapsyrdy. Aýrýhana donorlyq qyzmetke belsendi qatysyp keledi. Bul shara bir jaǵynan yntymaqtastyq pen uıymshyldyqty nyǵaıtý bolsa, endi bir jaǵynan qoǵamnyń ál-aýqatyn arttyrýǵa qosqan shaǵyn úlesimiz. Qalalyq qan ortalyǵynyń qoldaýymen ótkiziletin Donor kúni bizdiń dástúrimiz deýge bolady», - deıdi Almaty qalalyq jedel shuǵyl kómek kórsetý aýrýhanasy bas dárigeriniń orynbasary Gúlnar Jantýova.
Qalalyq qan ortalyǵynyń donorlar jınaqtaý bóliminiń meńgerýshisi Nurdáýlet Ábdiqadyrovtyń aıtýynsha, qan tapsyrýǵa nıet bildirýshilerdiń qatary jyldan jylǵa kóbeıip keledi.
«Olardyń ishinde jastar kóp, bul qýantpaı qoımaıdy. Qandy kez kelgen deni saý, 18 jastan asqan, salmaǵy kem degende 50 kg bolatyn adam tapsyra alady. Árıne, donorlyqqa qarsy kórsetilimderi bolmasa. Bir adam tapsyratyn 450 ml qannyń fızıologııalyq dozasy úsh adamnyń ómirin saqtap qalýy múmkin. Almaty - úlken qala. Sondyqtan donorlyq qanǵa qajettilik qashanda bolady. Júıeli qan tapsyrý júrek-tamyr júıesin nyǵaıtyp, aǵzanyń ózin-ózi jańartý qyzmetin qamtamasyz etedi, - deıdi Nurdáýlet Ábdiqadyrov.