Almatylyq dárigerler 10 kg-nan asatyn eń úlken mıomany áıel jatyrynan alyp tastady
Densaýlyq saqtaý mınıstrliginiń málimetinshe, jatyr kólemi salmaǵy 10 kg - 40 aptalyq júktilik kórsetkishterine saı keldi. Іsik kóleminiń úlken bolǵandyǵy sonsha, áıeldiń demalýy qıyndaı túsken.
Otanyń ereksheligi, naýqasta atalǵan negizgi kórsetkishten bólek basqa da kóptegen ilespe aýrýlar bolǵan: arterııalyq gıpertonııa, mıokardıodıstrofııa, sınýsty tahıkardııa, 2-tıptegi qant dıabetiniń aýyr dárejesi, dekompensatsııa kezeńi jáne jedel asqyný-aýyr atsıdoz (aǵzadaǵy qyshqyldyq negizdik tepe-teńdiktiń joǵary qyshqyldyqqa aýysýy).
OQKA dırektorynyń orynbasary, qaýymdastyq professory Jasulan Baımahanovtyń jetekshiligimen, onko-gınekolog, m.ǵ.d. Alısa Baınazarova, klınıka endokrınology Saltanat Shaıdarova jáne anastezıolog-reanımatologtar brıgadasy dárigerlerdiń mýltıdıstsıplınarlyq konsılıýmy ótkizildi.
Jaǵdaı tolyq turaqtanbaı turyp, aýrýdyń klınıkalyq kórinisin, atap aıtqanda, jaqyn turǵan organdardyń qyzmetiniń buzylýyn eskere otyryp, ómirlik kórsetkishter boıynsha jatyrdy eksterpatsııalaý otasy jasaldy.
«Jatyr moınymen birge organnyń denesin alyp tastaıtyn jatyrdy alyp tastaý otasy osylaı atalady. 2 saǵatqa jýyq ýaqytqa sozylǵan ota sátti ótti. Qazir naýqas ózin jaqsy sezinedi, jaǵdaıy turaqty, aýrýhanadan shyǵarýǵa daıyndalyp jatyr», – deıdi Alısa Baınazarova.
Qazirgi ýaqytta emdelýshi OQKA gınekologııa bólimshesinde em alyp jatyr. Óz kezeginde naýqas ómirin saqtap qalǵan dárigerlerge alǵysyn bildirdi:
»20 jyl buryn domalaq isik paıda boldy, alǵashqyda ol óte kishkentaı edi, keıinnen úlkeıe tústi. Júregimdi teksertýge barǵanda dárigerler maǵan mıomany tekserý kerek ekenin aıtqan. Biraq, ol kezde ol isik maǵan kedergi keltirmegendikten mán bermedim. 2021 jyly men koronovırýstyq ınfektsııamen aýrýhanada jattym, sol kezde de dárigerler meni tolyq tekseristen ótkizip, ÝDZ jasaǵanda mende isik bar ekenin aıtyp, aýrýhanadan shyqqan soń qajetti mamanǵa barýym kerek ekenin eskertken. Biraq ol kezde de men dárigerge barmadym. Solaı úı tirshiligi, kúndelikti jumys dep júrip uzaq ýaqytqa sozyp jiberdim. Al, ishimniń ósip jatqanyn salmaq qosyp, tolyp bara jatqan soń osylaı bolyp jatyr dep oıladym. Artynsha etekkirim ketken soń qan ketý bastaldy, tek sol kezde ǵana men dárigerdiń kómegine júgindim. Maǵan MRT jasaǵan soń óte úlken kólemdegi mıoma bar ekenin jáne ony shuǵyl túrde otamen alyp tastaý kerek ekenin aıtty. Sol ýaqytta meniń jaǵdaıym qıyndaı túsip, qan qysymym 195-ke jetti. Meniń ómirimdi saqtap qalǵan dárigerlerge sheksiz alǵysymdy bildiremin,- deıdi emdelýshi.
Gınekolog Alısa Baınazarova qazirgi ýaqytta jatyr mıomasy óte keń taralǵan aýrý túri ekenin atap ótti.
Áıel adam óz densaýlyǵyna alańdamaýy úshin jáne paıda bolǵan aýrýdy der kezinde anyqtap, emdeý úshin gınekolog dárigerge jıi qaralyp turýy qajet. Sebebi, kóp aýrý jaǵymsyz áser týdyrmaı, esh belgisiz bastalady.