Almatylyq belsendiler «Arys, biz birgemiz» aktsııasyna ún qosty

ALMATY. QazAqparat- Almatylyq belsendiler «Arys, biz birgemiz», aktsııasyn qoldady. Maqsat Arystaǵy jarylystan zardap shekkenderge kómektesý dep habarlaıdy QazAqparat tilshisi.

«Qurmetti Almatylyqtar!

Sizderdi Arystaǵy tótenshe jaǵdaıǵa baılanysty gýmanıtarlyq kómek kórsetýge shaqyramyz! Birinshi kezekti qajetti dúnıeler: gıgıenalyq zattar, kespe ónimderi, konserviler, balalarǵa arnalǵan kıimder, jamylǵy men kórpe. Jınaý pýnktiniń meken-jaıy: Abylaıhan kóshesi 79. Myna telefon nómirine 8-7471293969 habarlasýǵa bolady»,- dep jazylǵan WhatsApp jelisi arqyly taralǵan habarlamada.

Esterińizge salaıyq, búgin tańerteń Arys qalasyndaǵy áskerı bólimniń qoımasynda jarylys boldy. Oqıǵa ornynda jeke quramnyń 52 adamy, Túrkistan oblystyq TJD-niń 12 órt sóndirý tehnıkasy jumyldyryldy. Sondaı-aq, Shymkent qalasynan 23 maman, 4 tehnıka jáne kınologtar tartyldy. Qazirgi ýaqytta órt sóndirý men evakýatsııalyq jumystar áli de jalǵasyp jatyr. Sonymen qatar zardap shekkender anyqtalýda. Arnaıy jumys toby quryldy.

Alma Muqanova