Almatylyq alaıaq ınternet arqyly shardaralyq 76 muǵalimniń jalaqysyn urlaǵan

ShARDARA. QazAqparat - Túrkistan oblysy, Shardara aýdanynda bes mektep muǵaliminiń jalaqysyn ınternet arqyly urlap alǵan kúdikti sottaldy. Aıyptalýshy retinde tanylǵan Almaty qalasynyń turǵyny bes jylǵa bas bostandyǵynan aıyryldy, dep habarlaıdy QazAqparat tilshisi.

Shardara aýdandyq prokýratýrasynyń málimetinshe, almatylyq jigit ustazdardyń aılyǵyn ınternet arqyly urlaǵan. Sóıtip 76 muǵalimge 26 mln teńge kóleminde shyǵyn keltirgen. 1 S býhgalterlik baǵdarlamasyn jetik meńgergen ol qomaqty somany óz esepshotyna aýdaryp, oıynhanalarǵa jaratqan. Alaıda aqsha esepshotyna túsken soń ol kúdikke ilinip, Almaty qalasynan ustaldy. Tintý kezinde qaltasynan 1,5 mln teńgedeı tabylǵan. Sondaı-aq, anasy «balam bergen edi» dep 1 mln 300 myń teńgeni polıtsııaǵa tapsyrǵan. Qalǵan qarajattyń basym kópshiligin kazınolarǵa jaratyp qoıǵan bolyp shyqty.

«Aıyptalýshy Qylmystyq kodekstiń 188 baby 4-shi bóligimen kináli dep tanylyp, oǵan naqty 5 jylǵa bas bostandyǵynan aıyrý jazasy taǵaıyndaldy. Qazirgi tańda sot úkimi kúshine engen joq. Sonymen qatar jalaqynyń 12 mln teńgesin der kezinde qoldanylǵan sharanyń arqasynda ysyrap etilmedi. Qazirgi tańda ol qarjynyń barlyǵy memleket kirisine qabyldandy»,- deıdi Shardara aýdanynyń prokýrory Rýslan Ábdiraıymov.

Búginde ustazdardyń jalaqysy ishinara qaıtarylǵan. Qalǵan soma kúdiktiden qosymsha óndiriletin bolady.