Almatylyq akýsher aıaǵy aýyr áıeldi páterinde bosandyryp aldy

ALMATY. QazAqparat- Almatydaǵy №1 qalalyq perzenthananyń akýsheri Perızat Asqar tolǵaǵyn elemeı, týýǵa jaqyn qalǵan áıeldi úı jaǵdaıynda bosandyryp aldy, dep habarlaıdy QazAqparat tilshisi.

31 jastaǵy Almaty turǵyny ekinshi balasy bolǵandyqtan, perzenthanaǵa tolǵaǵyn «pisirip» bir-aq barmaqshy bolady.

Alaıda, bosaný protsesi jedeldep, perzenthanaǵa jete almaı qalǵan.

«Ol kúni men kezekshilikten shyǵyp, úıge qaıtyp kele jatqanmyn. Aýlada jedel járdem kóligi tur. Jınalǵandar tórtinshi qabatta aıaǵy aýyr áıeldiń bosanýǵa jaqyn ekenin aıtty. Birden sol páterge bardym. Ekiqabat kelinshek ishi aýyrsa da, tolǵaq dep oılamaǵan. Tipti, bala shyǵýǵa jaqyn qalypty. Perzenthanaǵa aparýǵa kesh edi. Sondyqtan, úı jaǵdaıynda aman-esen bosandyryp aldym. Sodan keıin jedel járdemmen perzenthanaǵa alyp ketti»,- deıdi Perızat Asqar.

Aıtýynsha, perzenthana qabyrǵasynan tys bosandyrý táýekelge toly bolsa da, keıde shuǵyl áreket etýge týra keledi.

Mundaı jaǵdaı bolmaý úshin júkti áıelder bosanýǵa daıyndyqty emdeý mekemesinde ótýi tıis.

Júktiliginiń ereksheligin, tolǵaqtyń barysyn, bosaný kezindegi ádisterdi meńgergeni jón.

Osy salada 10 jylǵa jýyq eńbek ótili bar tájirıbeli akýsher Perızat Abylaıqyzy osy ýaqyt aralyǵynda myńdaǵan sábıdiń aman-esen ómirge kelýine sebepshi boldy. Bir ǵana kezekshilikte jeti náresteniń kindigin kesken kezderide bar.

«Kópten kútken sábıin qolyna alyp, qýanǵan ananyń júzin kórý bir baqyt. Adam ómirindegi eń qýanyshty sátke kýáger bolyp júrgenim – júrek qalaýymmen tańdaǵan mamandaǵymnyń arqasy»,- deıdi ol.

Bilikti mamannyń sózinshe, bosandyrý barysynda eń basty mindet - ana men bala ómirin saqtap qalý.

«Bul rette qazir jańa tehnologııalar qoldanylyp júr. Atap aıtqanda balanyń júrek qaǵysyn baqylap turýǵa múmkindik beretin KTG apparatynyń kómegi zor»,- dep atap ótti Perızat Asqar.