Almatylyq 22 myń bala Ortalyq saıabaqtaǵy attraktsıondardy tegin paıdalana alady

ALMATY. QazAqparat- Jazǵy kanıkýl kezeńinde Almaty qalasy ákimdigi áleýmettik osal otbasynan shyqqan balalardyń Ortalyq mádenıet jáne demalys saıabaǵynda attraktsıondardy tegin paıdalaný máselesin pysyqtady, dep habarlaıdy QazAqparat tilshisi.

Ákimdik usynysyn saıabaq ákimshiligi qoldady. Osylaısha, saıabaqta attraktsıondarǵa tegin kartochkalar berý týraly sheshim qabyldandy. Bul aktsııa Almaty turǵyndary úshin qoljetimdi bolmaq.
«Atalǵan aktsııamen halyqtyń áleýmettik osal toptary (HÁOT) sanatyndaǵy 22 myń balany qamtý josparda. Bul kartalar kez kelgen attraktsıondar men karýselderge, sonyń ishinde barlyǵynyń súıikti «Tsepochka», «Koleso obozrenııa» jáne katamaranmen júrýge múmkindik beredi. Attraktsıondardy tegin paıdalaný 15 shildeden bastap qol jetimdi bolady»,- dep habarlady ákimdikten.
Kartochkalardy alý úshin «Altyn Taraz» JShS keńsesine Gogol kóshesi, 1 mekenjaıy boıynsha habarlasý qajet.
Ózińizben birge balanyń týý týraly kýáligi (kóshirmesi nemese elektrondy túrde) bolýy mindetti. Anyqtama telefony: [phone].
«Sonymen qatar, balalarǵa qoǵamdyq birlestikterdiń (múgedekter úıleri, sańyraýlar qoǵamdary, balalar úıleri, mektep-ınternattar) ótinimderi boıynsha attraktsıondar tegin»,- dep atap ótti ákimdiktiń baspasóz qyzmetinen.
Budan bólek saıabaqta tegin nysandar bar: fýtbol alańy, basketbol alańy, konkı parki, rollerdrom, ústel tennısi alańy. Jaz mezgilinde ár senbi jáne jeksenbi kúnderi balalar qalashyǵynyń sahnasynda búldirshinderge arnalǵan eki saǵattyq tegin shoý baǵdarlamasy usynylady.
Saıabaq ákimshiligi barlyq is-sharany ótkizýge ketetin shyǵyndardy óz moınyna aldy.