Almatyǵa Reseıden jetkizilgen dáriniń iri partııasy úsh kún ishinde sertıfıkattalady
Reseıden 55 tonna medıkament jetkiziledi, júk quramynda áleýmettik mańyzdy 10-nan astam preparat ataýy boıynsha shamamen 3 mln qaptama, sonyń ishinde, dene qyzýyn túsiretin jáne COVID-19-ǵa qarsy basqa da dárilik quraldar bar. Tizimde – «Azıtromıtsın», «Tseftazıdım», «Ibýprofen», «Fraksıparın», «Metronıdazol», «Tseftrıakson», «Geparın», «Nımesýlıd», «Levofloksatsın», «Meropenem» untaǵy, «Enoksaparın», «Bınergııa» jáne basqalary bar.
QR Densaýlyq saqtaý mınıstrliginiń Taýarlar men qyzmetterdiń sapasy men qaýipsizdigin baqylaý komıtetiniń málimetteri boıynsha, dárilik quraldar men preparattar deklaratsııalaý jolymen úsh kún ishinde sertıfıkattalady.
«Bizdiń tarapymyzdan QR Úkimetine preparattardy sertıfıkattaý, jańa preparattardy jedel tirkeý jáne tez jetkizý protsedýralaryn jeńildetý usynysy jasaldy. Bul usynysty ekonomıkalyq ósimdi qamtamasyz etý jónindegi Memlekettik komıssııa qoldady. Osylaısha, biz medıtsınalyq preparattardy sertıfıkattaý men olardy jetkizýdegi prtsedýralardyń jeńildetilýine qol jetkizdik. Osy sharalardyń bári qalany dárimen qamtamasyz etýge jáne jedel jetkizýge múmkindik beredi», - dedi Almaty qalasy ákimdiginiń qalany dárilik preparattarmen qamtamasyz etý jónindegi úılestirýshi Zańǵar Sálimbaev.
Sonymen birge, shilde aıynyń ortasynda Úndistannan eki partııa dári-dárimek keledi dep kútilýde.
Kelgennen keıin dárilik preparattar tórt iri farmatsevtıkalyq kompanııa arasynda odan ary dárihanalarǵa jetkizilý úshin bólinedi. Bul «Medservıs plıýs» KFK JShS, «Hımfarm» AQ, «Nobel Almaty farmatsevtıkalyq Fabrıkasy» AQ, INKAR jelileri.
«Hımfarm» AQ-nyń habarlaýynsha, vırýsqa qarsy preparattary bar júk memlekettiń jedel áýe jetkiziliminiń arqasynda Qazaqstanǵa jetti.
«Kompanııa barlyq qajetti sharalardy qolǵa aldy, jáne tek óz kásipornynda dári óndirý kólemin ulǵaıtyp qana qoıǵan joq, sonymen birge, Reseıdegi óziniń seriktesterimen – vırýsqa qarsy preparattar shyǵaratyn «Akrıhın» kompanııasymen baılanysqa shyqty, olar óndiretin vırýsqa qarsy preparattardy qazaqstandyq «Hımfarm» AQ shyǵarmaıdy. Osy seriktestiktiń jáne Máskeýden transporttyq áýe bortyn uıymdastyrýda eki memlekettiń kórsetken jedel qoldaýynyń arqasynda Qazaqstanǵa búgin «Oseltamıvır» vırýsqa qarsy prepattyń úlken partııasy bar reıs keldi. Atalǵan preparat dıstrıbıýtorlyq kompanııalarǵa dereý tıelip, elimizdiń dárihanalaryna jaqyn kúnderi jetkiziledi», - dep habarlady «Hımfarm» AQ.
Sonymen qatar, RF-nan keletin júkten ózge Almatyǵa shildeniń sońyna deıin áleýmettik mańyzy bar shamamen 4,2 mln qaptama dári-dármek jetkiziledi dep kútilýde.
«Búgin biz Úkimettiń qoldaýy arqasynda Reseıden eki ushaqtyń kelýin kútýdemiz. Eń qajet preparattar jetkiziledi. Biz óte qajet dári-dármektiń 13 túrin jabamyz. Olar - azıtromıtsın, tseftrıakson, ıbýprofen jáne basqalary. Úndistannan da jetkizilim josparlanǵan. Ushaqtar koronavırýs ınfektsııasyn emdeıtin preparattardy ǵana bizge tasymaldaıdy», - dedi «INKAR» JShS bas dırektory Álııa Erimbetova.
Óz kezeginde «NOBEL Almaty farmatsevtıkalyq fabrıkasy» AQ shuǵyl túrde jetkizilgen preparattardyń barlyǵynyń pandemııaǵa qatysty ekenin atap ótti. Olardyń ishinde keń aýqymdy antıbıotıkter bar. Jetkizilgen preparattar odan ári tasymaldaý úshin dıstrıbterlerge beriletin bolady.
Eske salsaq, Almatyda qala ákimi Baqytjan Saǵyntaevtyń tapsymasy boıynsha dári-dármekterdi irkilissiz jetkizý úshin óndirýshilermen, iri jetkizýshilermen jáne dári-dármek dıstrıbıýterlerimen belsendi jumystar júrgizilýde. Barlyq farmkompanııalar 1 shildeden bastap dárihanalarǵa áleýmettik mańyzy bar 581 myń dana preparattardy jóneltti, olardyń ishinde «Paratsetamol», «Aspırın», «Ingavırın», «Ibýprofen», «Azıtromıtsın» jáne basqa dáriler, sonymen qatar termometrler bar.
Dári-dármekke degen suranystyń artýy barysynda qala ákimdigi, jetkizýshiler men dárihanalar jelisi ózara kelisimge qol qoıyp, nátıjesinde áleýmettik mańyzy bar dári-dármektiń 41 túri dereý jetkiziletin 105 dárihana anyqtalǵan bolatyn. Osynyń arqasynda dári-dármekterdi jetkizý, olardyń baǵasyn kótermeý jáne bir qolǵa úsh qaptamadan artyq dári bermeý máseleleri retke keltirilýde. Sonymen qatar, atalǵan 105 dárihanada dárilerdiń ótýine, olardyń 10 túriniń jáne termometrlerdiń qansha qalǵanyna kún saıyn monıtorıng júrgiziledi.
Buǵan deıin, Almatyda dári dármektiń turaqty qoryn qurý úshin 5 mlrd teńge bólingeni týraly jazǵan bolatynbyz.