Almatyǵa NASA ǵaryshkeri Shennon Ýoker keledi
«4-10 qazan aralyǵynda Almatydaǵy AQSh Bas konsýldyǵy jáne American Space Almaty Chevron kompanııasymen birlesip, «2019 ǵarysh aptasyna» shaqyrady. Apta aıasynda ǵarysh salasyndaǵy ǵylymı-tehnıkalyq jetistiktermen tanystyratyn oıyn-saýyq, shyǵarmashylyq, bilim sharalarynan qurylǵan keń baǵdarlama usynylady», delingen habarlamada.
Dúnıejúzinde bıyl «Aı: juldyzǵa aparar jol» taqyrybynda ótetin 2019 ǵarysh aptalyǵy «Apollon-11» mıssııasynyń Aıǵa qonýynyń 50 jyldyǵyna arnalady.
Osyǵan oraı, Qazaqstandaǵy AQSh Dıplomatııalyq mıssııasy Almatyǵa 2004 jylǵy NASA 19-astronavtar tobynyń múshesi, 2010 jyly Baıqońyrdan ushyp, ǵarysh keńistiktiginde 163 kún bolǵan uzaq merzimdi mıssııa 24/25 ekspedıtsııasynyń ushý ınjeneri doktor Shennon Ýokerdi arnaıy shaqyrǵan.
4 qazannan bastap, qala turǵyndaryn bir aptalyqta dóńgelek ústelder, prezentatsııalar, kórmeler, «Kamensk taqtasy» observatorııasyna barý, sheberlik sabaqtary, saıystar men oıyndar, tegin kıno kórsetilimderi, sondaı-aq balalar men úlkenderge arnalǵan Space party keshteri kútýde. Buǵan qosa, aptalyq aıasynda qazaqstandyq ǵarysh salasyndaǵy ınstıtýttar men bolashaq ınjenerler ǵarysh óndirisiniń ǵalamdyq jetistikteri, AQSh-tyń osy saladaǵy úzdik roli men Qazaqstannyń eleýli úlesin talqylaıtyn bolady.
Aıta keterligi, Shennon Ýoker 2004 jyly NASA 19-astronavtar tobynyń múshesi bolyp iriktelgen. Ol fızıka ǵylymdarynyń bakalavry, Raıs ýnıversıteti Ǵaryshtyq fızıka ǵylymdarynyń magıstri jáne doktory. Doktor Ýoker kásibı jolyn 1987 j. L. Djonson atyndaǵy Ǵarysh ortalyǵy janyndaǵy Rokýell Ǵaryshtyq operatsııalar kompanııasynda Speıs Shattl baǵdarlamasynyń robottardyń ushýyn baqylaýshy qyzmetinen bastaǵan. 2010 jyly ol Halyqaralyq ǵarysh stansasyndaǵy uzaq merzimdi mıssııa 24/25-ekspedıtsııasynyń ushý ınjeneri retinde 163 kún boıy ǵaryshta boldy.