Almatyǵa qosylǵan aýmaqtarda ınfraqurylym damyp keledi

ALMATY. QazAqparat - Almaty ákiminiń orynbasary Muhıt Ázirbaev Óńirlik kommýnıkatsııalar qyzmetiniń baspasóz máslıhatynda qalaǵa qosylǵan aýmaqtardy ınfraqurylymdyq damytý boıynsha júrgizilip jatqan jumystar týraly aıtyp berdi, dep habarlaıdy QazAqparat tilshisi.

Almaty oblysyna qarasty Qarasaı, Talǵar jáne Іle aýdandary ýchaskeleriniń megapolıske qosylýyna baılanysty qala bıligi halyqty taza aýyz sýmen qamtamasyz etýge erekshe kóńil bólýde.

Muhıt Ázirbaevtyń aıtýynsha, bıylǵy jyly sýmen jabdyqtaý jáne sý burý jelileriniń qurylysy boıynsha jumystar 24 shaǵyn aýdandy qamtydy. 10 aıda 120 shaqyrym sýmen jabdyqtaý jáne 77 shaqyrym káriz jelisi júrgizildi.

Bıyl 14 shaǵyn aýdandandaǵy jyly jelilerdiń qurylysyn aıaqtaý josparda, bul 23 myńnan astam úıdi qalalyq jelilerge qosýǵa múmkindik beredi.

Almaty bıligi sapaly elektrmen jabdyqtaý máselesin de nazardan tys qaldyrmady.

Máselen, «Tuzdybastaý» qosalqy stansasyn salý esebinen Túrksib aýdanynyń 200 myńnan astam turǵyny 2022 jyly turaqty elektrmen jabdyqtaýǵa qol jetkizedi.

Sondaı-aq, Jetisý aýdanynda jańa qosalqy stansa qurylysyn bastaý josparda.

Almaty ákimniń orynbasary turaqty elektrmen jabdyqtaý boıynsha jumystar ıesiz jeliler boıynsha da júrgizilip jatqanyn atap ótti.

«Bıyl 91,8 km elektr jelisi ıesiz dep tanylyp, «Alataý jaryq kompanııasy» AQ-ǵa qyzmet kórsetý úshin berildi. Qazirgi ýaqytta 83,5 km ıesiz jeliler energotıimdilik jáne ınfraqurylymdyq damý basqarmasyna bekitilip, keıinnen «Alataý jaryq kompanııasy»AQ-ǵa beriledi.

«Shetsiz qala» tujyrymdamasyn iske asyrý kezinde syrtqy jaryqtandyrýǵa erekshe kóńil bólinedi. Qala ákimi Baqytjan Saǵyntaevtyń sońǵy 2 jyldaǵy bastamasynyń arqasynda megapolıstiń 1 963 kóshesi kóshe shamdarymen qamtamasyz etildi», - deıdi ol.

Sonymen qatar,ol búgingi tańda megapolıs turǵyndarynyń 99,2 paıyzy tabıǵı gazǵa qosylǵanyn atap ótti. 2022 jyly 100%-ǵa jetedi.