Almatyǵa koronavırýsqa qarsy preparattardyń jańa partııasy jetkizildi

ALMATY. QazAqparat – Almaty áýejaıyna dárilik preparattar tıelgen kezekti bort kelip qondy, dep habarlaıdy QazAqparat qala ákimdiginiń baspasóz qyzmetine silteme jasap.

Júktiń jalpy salmaǵy – 32 tonna, oǵan «Іńkár» farmatsevtıkalyq kompanııasy qaladaǵy dárihanalar jelisi úshin Úndistannan tapsyrys bergen.

Kompanııa ókilderiniń málimdeýinshe, áýejaıda kovıdke qarsy preparattardyń 242 myń orama kólemindegi partııasy túsirilgen.

Júk kedendik tazalaýdan ótip, qajetti qujattar rásimdelgen soń, kompanııanyń qoımasyna jetkiziledi, odan keıin dárihanalar jelisine aparylady.

Kompanııadan sondaı-aq arnaıy Turaqtandyrý qoryna dárilik zattardy satyp alý mehanızmi iske asyryla bastaǵanyn habarlady.

Eske sala keteıik, Almaty qalasynyń ákimi Baqytjan Saǵyntaevtyń tapsyrmasy boıynsha qajetti dári-dármekterdi satyp alý úshin farmkompanııalardy paıyzsyz nesıelendirý maqsatyna 5 mlrd teńge bólingen. Bul qarajat qaıtarymdy.

Belgili bolǵandaı, shilde aıynyń basynda qalanyń keıbir dárihanalarynda qyzý túsiretin jáne ózge de preparattardyń tapshylyǵy baıqalǵan. Alaıda shuǵyl sharalardyń arqasynda jaǵdaı turaqtandy. Budan basqa, qalanyń Turaqtandyrý qorynan covid-ke qarsy statsıonarlarǵa dári-dármek jetkizý boıynsha jumys bastalyp ketti.

Buryn habarlanǵandaı, shilde aıynyń sońyna deıin Almatyǵa covid-ke qarsy preparattardyń shamamen 6,5 myń oramasy jetkiziledi.

16 shildeniń keshinde qalaǵa Úndistannan jalpy salmaǵy 10 tonnany quraıtyn medıkamentter tıelgen ushaq, al 17 shildede áýejaıda 23 tonna dári-dármekti jetkizgen Reseı Federatsııasynyń áýe kemesi kelip qonǵan.