Almatydan Qaskeleńge shyǵatyn jolǵa «Sergek» kameralary ornatylady

ALMATY. QazAqparat – Almaty polıtsııasy qalanyń shyǵa berisinde, joldyń qaq ortasynda kólik toqtatyp, keptelis týdyratyndardyń jıileýine baılanysty tártip ornatpaq, dep habarlaıdy QazAqparat tilshisi.

«Jol-kólik qozǵalysynyń kúrdelenýine baılanysty qalyptasqan jaǵdaıǵa alańdaımyz. Keıbir azamattar taksı qyzmetin kórsetetin ótip bara jatqan kólikti jol júrisi bóliginde toqtatpaq bolyp, jasandy keptelis nemese apattyq jaǵdaı týdyrady. Bul jol júrisi qatysýshylarynyń ómiri men densaýlyǵyna qaýipti», - deıdi Almaty qalasy PD Ákimshilik polıtsııa basqarmasy bastyǵynyń orynbasary Bolatbek Baıatanov.

Polıtsııa ókiliniń aıtýynsha, atalǵan máselege baılanysty negizgi núktelerge eksperımenttik túrde «Sergek» kameralary ornatylady.

«Tóle bı dańǵyly - Momyshuly kóshesi, Raıymbek dańǵyly - Momyshuly kóshesi, Raıymbek dańǵyly - Áshimov kóshesi», - dep naqtylady ol.

Sonymen qatar, jol qozǵalysynyń barlyq qatysýshylaryna (kólik júrgizýshilerge de, jaıaý júrginshilerge de) erejeler talaptaryn qatań saqtaý qajettigin eske saldy.