Almatydan Arysqa gýmanıtarlyq júk tıelgen alǵashqy kólikter attandy

ALMATY. QazAqparat - Almatylyqtar Arys turǵyndaryna jınaǵan gýmanıtarlyq kómektiń alǵashqy legi Túrkistan oblysyna attandyryldy. Bul týraly qala ákimi Baýyrjan Baıbek Instagram-daǵy paraqshasynda jazdy, dep habarlaıdy QazAqparat tilshisi.

Vıdeoda júk kólikteriniń kolonnasy jolǵa shyǵyp bara jatqany kórinedi.

«Bizdiń kúshimiz - birlikte! Arysqa almatylyqtardyń kómegi bara jatyr», - dedi ol.

Munyń aldynda B.Baıbek almatylyqtardy Arys qalasynda japa shekken turǵyndarǵa kómektesýge shaqyrǵan bolatyn.

Osy ýaqytqa deıin arnaıy qorlarǵa Almatydaǵy №4 aýrýhana dárigerleri, qalalyq TJD qyzmetkerleri, ákimdik, kommýnaldyq kásiporyndardyń, Ulttyq banktiń qyzmetkerleri qarajat aýdardy.

Eske sala ketsek, Arys qalasyndaǵy áskerı bólimniń qoımasynda 24 maýsym kúni tańerteń jarylys boldy. Apat saldarynan eki adam mert boldy. 170-ke jýyq adam zardap shekti. 20-ǵa jýyq úı, 9 qora-qopsy janyp, dalaly aýmaqta 14 oshaq tutandy. Úı-jaılar men ǵımarattardyń 80-90 paıyzyna ártúrli deńgeıde zaqym keldi. Birqatar óńirde shuǵyl jeliler quryldy.

Túrkistan oblysyna arnaıy barǵan Qazaqstan Prezıdenti Qasym-Jomart Toqaev Arystaǵy áskerı bólimshedegi oq-dári qoımasyndaǵy jarylystan zardap shekken qala turǵyndarymen kezdesip, qalanyń qalpyna keltiriletinine ýáde berdi. Sondaı-aq Elbasy Nursultan Nazarbaev Arystaǵy jaǵdaıǵa alańdaýshylyq bildirdi.

Búgingi Úkimet otyrysynda Premer-Mınıstr Asqar Mamın jarylys saldarynan kóz jumǵandardyń týǵan-týystaryna kóńil aıtyp, turǵyndarǵa barlyq kómek kórsetiletinin aıtty.

Evakýatsııalaý kezinde myńnan astam ata-ana balarynan kóz jazyp qaldy. Qazirgi ýaqytta olardyń barlyǵy da balalarymen qaýyshty, barlyǵy din-aman.

Fakti boıynsha qylmystyq is qozǵady.

Qaladaǵy tótenshe jaǵdaı jolaýshylar poıyzdarynyń kestesine de áser etti.

25 maýsym, saǵat 12.00-degi jaǵdaı boıynsha áskerı bólim aýmaǵynda jarylystar toqtady. Degenmen, oq-dáriler saqtalatyn qoımalardyń aýmaǵynda byqsyǵan ottyń oshaqtary baıqalǵandyqtan, QR Іshki ister mınıstrligi jarylystardyń qaıtalaný qaýpi saqtalyp otyrǵanyn eskertti.

Osy ýaqytta QR Qorǵanys mınıstrliginiń áskerı-ınjenerlik qyzmetshileri Arys qalasyn mınadan tazalaý jumystaryn júrgizip jatyr. Snarıadtardyń deni turǵyn úı alqaptaryna túsken.

Arys turǵyndaryna kómek qolyn sozý maqsatynda elimizde «Arys, biz birgemiz» aktsııasy bastaý aldy.