Almatydaǵy jer asty joldaryna Batyrhan Shúkenov pen Denıs Tenniń sýreti salyndy
Almatyda jer asty ótpe joldaryn jóndeý jumystary aıaqtalyp keledi. Abaı dańǵylyndaǵy ótpe joldar kisi tanymastaı ózgerdi. Abaı jáne Dostyq dańǵyldarynyń qıylysynda uly aqyn Abaıdyń qanatty sózderi jazyldy, Abylaı han dańǵylyna qaraǵan tustaǵy jer asty joly «Jeti qazyna» kompozıtsııasymen árlendi.
Tımırıazev kóshesiniń QazUÝ aıaldamasyndaǵy jer asty jolyna vıdeobaqylaý kameralary ornatyldy, zamanaýı stılde bezendirilgen «stýdentterdiń burynǵy podzemkasy» endi HHІ ǵasyrdyń mádenı jetistikterin pash etip tur. Munda o dúnıelik bolǵan talantty kompozıtor ári ánshi Batyrhan Shúkenovtiń, Sochı Olımpıadasynyń qola júldegeri Denıs Tenniń beıneleri kózdiń jaýyn alady. Budan tys, Vıktor Tsoıdyń beınesi de kompozıtsııadan oıyp turyp oryn alǵan. Jer asty jolynan óterde «A'Stýdıo» tobynyń, Batyrhan Shúkenov jáne «Kıno» tobynyń ánderin tyńdaýǵa bolady.
Eske sala keteıik, bıyl jazda Almatydaǵy 56 jer asty ótpe jolynyń 48-i kúrdeli jóndeýden ótip jatyr. Olardy jańǵyrtýǵa bıýdjetten 2,5 mlrd teńge qarajat bólindi. Biryńǵaı stılıstıkany saqtaý maqsatynda biryńǵaı talaptar negizinde jóndeý mindeti qoıyldy. Budan tys, endi ótpe joldarda saýda, qyzmet kórsetý oryndary bolmaıdy.