Almatydaǵy jasyryn kazınonyń qyzmetkerleri men klıentteri jazalandy

NUR-SULTAN. QazAqparat - Almatydaǵy jasyryn kazıno qyzmetkerleri de, klıentteri de jazalandy. Bul týraly onlaın brıfıng barysynda QR Sybaılas jemqorlyqqa qarsy is-qımyl agenttigi 1-shi departamenti basshysynyń orynbasary Danııar Aqýan aıtty, dep habarlaıdy QazAqparat tilshisi.

«Agenttiktiń jáne Ulttyq qaýipsizdik komıtetiniń Almaty qalalyq departamentteri QR Ulttyq gvardııanyń «Búrkit» arnaıy maqsattaǵy bólimshesin tarta otyryp, eldegi tótenshe jaǵdaı kezinde jáne qaladaǵy karantın rejımi ýaqytynda osy jylǵy naýryz aıynan bastap jumys istegen oıyn mekemesiniń zańsyz qyzmetiniń jolyn kesý boıynsha aýqymdy operatsııa ótkizdi. Atalǵan jedel-izdestirý is-sharasy 2020 jyly sáýirdiń 24-inen 25-ine qaraǵan túni ótkizilip, nátıjesinde vedomstvo qyzmetkerleri qalanyń ortasynda ornalasqan ákimshilik ǵımaratta keliýshi men personal arasynan 30-dan astam adamdy qumar oıyndaryna qatysqandyǵy úshin ustady», - dedi ol.

Onyń atap ótýinshe, qumar oıyndary ótkiziletin orynǵa tek qana turaqty klıentter ǵana óte alatyn arnaıy ótkizý júıesi ornatylǵan. Tintý is-sharalary barysynda aýdany 1 000 sharshy metrden asatyn kazınoda pokerge jáne amerıkalyq rýletkaǵa arnalǵan 6 oıyn ústeli, kóptegen karta men fıshka, sondaı-aq zańsyz qyzmetten bir kúnde túsetin iri mólsherdegi aqsha tabylyp, tárkilengen.

«Zańsyz oıyn mekemesin uıymdastyrý faktisi boıynsha QR QK-niń 307-baby 2-bóligimen sotqa deıingi tergep-tekserý júrgizilýde. «Astyrtyn kazınonyń» barlyq qatysýshyna tótenshe jaǵdaı rejımin buzý faktisi boıynsha ákimshilik hattamalar toltyryldy. Ustalǵan 18 tulǵaǵa qatysty sottyń sheshimimen 5 táýlikke deıingi ákimshilik qamaý qoldanylyp, 6 tulǵaǵa qatysty jalpy somasy 166 680 teńge, ıaǵnı, árqaısysyna 27 780 teńgeden aıyppul salyndy», - dedi Danııar Aqýan.