Almatydaǵy ushaq apaty kezinde jas jigit júkti áıeldi denesimen japqan

NUR-SULTAN. QazAqparat – Almaty mańynda «Bek Air» áýe kompanııasynyń ushaǵy qulaǵan sátte jolaýshylardyń biri janynda otyrǵan júkti áıeldi denesimen jaýyp aman alyp qalǵan. Bul týraly ushaqta bolǵan jolaýshylardyń biri Ásem Japısheva óziniń Facebook-tegi paraqshasynda jazdy, dep habarlaıdy QazAqparat.

Ásemniń aıtýynsha, Temirlan Qadaýov Nur-Sultan-Almaty baǵytymen ushyp bara jatyp, apatqa ushyraǵan «Bek Air» áýe kompanııasynyń ushaǵynda bolǵan.

«Onyń janynda meniń qyzym Gúlim Aqysheva otyrdy jáne ol júkti edi. Temirlan ushaq qulaǵan sátte ony denesimen jaýyp qalǵan. Apattan soń qyzymdy qaýipsiz jerge aparyp, ózi ózge jolaýshylardyń shyǵýyna kómektesken. Ol naǵyz er azamat, óziniń jaraqatyna qaramastan osyndaı qıyn sátte batyldyq tanytty. Biz, Gúlimniń ata-analary Temirlannyń ata-anasyna osyndaı er azamat tárbıelegeni úshin alǵys aıtqymyz keledi»,-dep jazdy.

Jazbanyń astyna jeli qoldanýshylary Temirlanǵa osy jasaǵan erligi úshin alǵystaryn jaýdyryp jatyr.