Almatydaǵy temir jol vokzaldary QTJ menshigine qaıtarylady
Almaty ákimimen kezdesýge arnaıy kelgen Túrksib aýdany turǵyndarynyń biri Almaty -1 temir jol vokzaly mańyndaǵy máseleni kóterdi.
«Birinshi másele, Almaty-1 vokzalyna qatysty. Kólik qozǵalysyn retteý kerek. Kólik keptelisi Sholohov kóshesine jetedi. Sondaı-aq Aqan seri kóshesine solǵa burylýdy alyp tastady. Almatydaǵy birinshi vokzalǵa bıyl 50 jyl tolady. Sondyqtan oǵan az da bolsa jóndeý jumystaryn júrgizýińizdi suraımyz.
Ekinshi másele, Túrksibtiń júz jyldyǵy jaqyndap qaldy, 1927 jyly qurylys bastalyp, 1930 jyly aıaqtaldy. Bizdiń aýdan osy ataqty temirjoldyń atymen atalǵany belgili. Sondyqtan onyń júz jyldyq mereıtoıyna oraı Almaty-1 temirjol aldyna Túrksib zamanyndaǵy parovoz qoıylsa degen tilek bar. Osy máseleni qarastyryp, ruqsat berýińizdi suraımyz», - dedi ol.
Almaty ákimi Erbolat Dosaev eki vokzal da óte mańyzdy kólik ınfraqurylymy júıesi ekenin atap ótti.
«Almaty-1 temir jol vokzaly mańyndaǵy aýmaqty retke keltirý kerek. Avtoturaq retinde uıymdastyrýǵa bolatyn jeke aımaq bar. Men jer qatynastary bólimine osyny qaraýdy tapsyrdym – bálkim, aýmaqty kólikterden bosatý úshin kópdeńgeıli avtoturaqtar salamyz. Aqan seri kóshesine solǵa burylýǵa kelsek, qalalyq mobıldilik basqarmasyna ony anyqtap, sheshim qabyldaýdy tapsyramyn»,- dedi ol
Sondaı-aq Erbolat Dosaev Almaty-1 jáne Almaty-2 temir jol vokzaldary «Qazaqstan temir joly» ulttyq kompanııasyna qaıtarý týraly sheshim qabyldaǵanyn aıtty.
«QTJ ulttyq kompanııasy vokzaldarǵa jóndeý jumystaryn júrgizýdi josparlap otyr. Onyń damýyna qarjy salady. Túrksibtiń júz jyldyǵyna qatysty aıtar bolsam, ákimderge, qalalyq komıssııaǵa tapsyrma berildi. Bıyl Túrksib aýdanyna 85 jyl tolady. Іs-sharalar uıymdastyrylady. Máslıhat jumysyn bastaǵan boıda bıyl Túrksib aýdanyndaǵy barlyq ózekti máselelerin sheshýdi surap, júginetin bolamyz», - dedi Erbolat Dosaev.