Almatydaǵy tártipsizdikter kezinde shyǵynǵa ushyraǵan 17 kásipker 33 mln teńge aldy

NUR-SULTAN. QazAqparat - Óńirlik komıssııalar zardap shekken ShOB sýbektilerine keltirilgen shyǵyndy óteý týraly 2000-nan astam ótinishti qabyldady, dep habarlaıdy QazAqparat Almaty tragedııasy Telegram kanalyna silteme jasap.

Qazaqstan óńirlerinde zardap shekken kásipkerlerge ótemaqy tóleý ótinishterin qabyldaý bastaldy. 31 qańtardaǵy jaǵdaı boıynsha «InfoKazakhstan.kz» elektrondy platformasy arqyly Almaty, Shymkent, Almaty, Jambyl, Shyǵys Qazaqstan, Aqtóbe jáne Batys Qazaqstan oblystarynan keltirilgen shyǵyndy óteý týraly 2 myńnan astam ótinim kelip túsken.

Komıssııa málimetinshe, ótinish bildirgen kásipkerlerdiń esep aıyrysý shottaryna alǵashqy ótemaqylar túsken. Máselen, Almaty qalasy boıynsha 17 kásipker jalpy somasy 33 mln teńgeniń tólemin alǵan.

Úkimet kásipkerlik sýbektileriniń qyzmetin qalpyna keltirý maqsatynda keltirilgen zalaldy tez arada óteý jumysyn jalǵastyrady.