«Almatydaǵy tártip qalpyna keltirildi» - baspasózge sholý

ASTANA. QazAqparat - «QazAqparat» halyqaralyq aqparattyq agenttigi 19 shilde, seısenbi kúni jaryq kórgen respýblıkalyq buqaralyq aqparat quraldaryndaǵy ózekti maqalalarǵa sholýdy usynady.

***

Keshe Memleket basshysy Nursultan Nazarbaevtyń tóraǵalyǵymen Qaýipsizdik keńesiniń shuǵyl otyrysy ótti, dep jazady «Egemen Qazaqstan»basylymy.

Otyrys barysynda Іshki ister mınıstri Q.Qasymovtyń, Ulttyq qaýipsizdik komıtetiniń tóraǵasy V.Jumaqanovtyń, sondaı-aq, Qaýipsizdik keńesiniń basqa da músheleriniń Almaty qalasyndaǵy oqıǵalarǵa qatysty baıandamalary tyńdaldy.

Qazaqstan Prezıdenti qaza bolǵandar men zardap shekken­der­diń otbasylaryna kóńil aıtty jáne olar­ǵa memlekettik organdardyń bar­lyq qajetti kómekti kórsetýin tapsyrdy.

- Men qaza tapqan polıtseı­lerdiń otbasylaryna kóńil aıta otyryp, olarǵa kómek berý úshin tıisti jergilikti organdarǵa zań aıasynda barlyq sharany qolǵa alýdy tapsyramyn. Alda qandaı is-áreketti qolǵa alatynymyz­dy josparlaý úshin maǵan oqıǵa barysyn baıandap berseńizder deımin. Іshki ister mınıstri Qal­muhanbet Qasymov pen Ulttyq qaýip­­sizdik komıtetiniń tóraǵasyn tyńdaǵym kelip otyr, - dedi Nursultan Nazarbaev. Tolyǵyraq, «Qaýipsizdik keńesiniń shuǵyl otyrysy ótti» atty maqaladan oqýǵa bolady.

***

Sonymen qatar keshe, 18 shilde kúni Almatydaǵy oqıǵaǵa qatysty «Aıqyn» basylymy da «Almatydaǵy tártip qalpyna keltirildi» atty maqala jarııalady.

 

***

El Úkimeti qoıǵan mindetke sáıkes Densaýlyq saqtaý jáne áleýmettik damý mınıstrligi júrgizgen arnaıy zertteý kórsetkenindeı, eger qazirgi úrdis ózgermese, 2050 jylǵa qaraı Qazaqstandaǵy halyqtyń 55 paıyzy ońtústikte ómir súrýi múmkin.

Bul rette ońtústik oblystar turǵyndarynyń sany osy kezge qaraı 5 mıllıonǵa kóbeıedi, al soltústik óńirlerde (elordany qospaǵanda), kerisinshe, turǵyndar sany 1 mıllıonǵa kemýi yqtımal. Bul týraly «Aıqyn» gazeti xabarlaýda.

«Sondyqtan, memleket qazaqstandyqtardy elimizdiń soltústigi men batysyna erikti túrde qonystandyrý saıasatyn qolǵa alýda. Ol týraly Densaýlyq saqtaý jáne áleýmettik damý mınıstri Tamara Dúısenova túsinikteme berdi.Ońtústik Qazaqstan obly­sy­nyń ákimdigi mysaly, sol óńirdiń aý­dan-qala­larynda soltústik Qa­zaq­stanǵa shaqyrý máselesi boıynsha ju­mys júrgizýde. Eger ońtústik óńir­ler turǵyndary «Jumyspen qamtý - 2020» baǵdarlamasy aıasynda mem­le­ket belgilegen óńirlerge kóship bar­­sa, birinshiden, kótermeleý sýbsı­dııa­sy be­riledi. Ekinshiden, úı alýǵa kó­mek beri­ledi, aýyl-aýdanda óz bız­nesin ashýy úshin mıkrokredıtter usy­nylady, nemese oqyp, kásip meń­gerem dese, onyń barly­ǵy­na baǵ­dar­lama aıasynda jaǵdaı jasa­la­dy. Eger de azamat óz betimen baspana sa­typ alsa, ol báribir bul quqyq­tar­dan aıy­rylmaıdy, memlekettik qol­daý alýǵa tolyq quqyly dep sen­dir­di mınıstr T.Dúısenova», - deıdi basylym. Tolyǵyraq, «Uly kóshke ileskender qoldaý kóredi» atty maqaladan oqı alasyzdar.

***

«Ana tili» basylymy alty Alashtyń ardaǵy Jahansha Dosmuhameduly týraly derekti maqala arnap otyr.

«Jahanshah (tarıhı qujattar men ádebıetterde Jahansha, Djansha, Jahansha, Djıhansha, Jansha delinip, ártúrli áliptelingen) - azan shaqyryp qoıǵan esimi. El ishinde jaqyn-jýyq, týystary erkeletip Jansha atap ketken. Ol 1887 jyly Oral oblysy Jympıty aýdanyna qarasty Qaraqudyq bólimshesiniń №3 aýylynda malshylyqpen kúnin kórgen Dosmuhamed otbasynda dúnıege keldi. Jansha Dosmuhamedulynyń arǵy tegi on eki ata baıuly ishindegi tana rýynyń qaraqunan tarmaǵynan. Kózkórgenderdiń bizge jetken dereginshe, Janshany ákesi Buldyrty bolysy, Іlbishin ýezine qarasty aýyldyq kóshpeli orys-qazaq mektebine beredi. Týmysynan bilýge qushtar Jansha qatarynan únemi ozyqtyǵymen kózge túsedi», - delingen «Ultynyń ardaqty uly edi» atty maqalada.

***

Oralda perzentxanadan náreste urlyǵyna qatysty bollıvýdtyq sıýjetke uqsas detektıvti oqıǵa jelisi odan ári ýshyǵa tústi, dep jazady «Ekspress K» basylymy.

«Náresteniń qaıda ekeni osy kúnge deıin tabylmaı otyr, polıtseıler tipti bala dúnıege kelgenine kúmándana bastaǵan. 18 jastaǵy ana Lıýbov Batkaeva ábden toryǵyp, ne isterin bilmeı júr. Onyń anasy Natalıa Dremanova shaqalaqty tabý úshin BAQ-qa júginip, kómek suraǵan. Osydan soń, qoǵam da alańdaýshylyq bildire bastady. Lıýbov Batkaevanyń aıtýynsha, onyń ulyn balanyń ákesi Dmıtrıı Alıev urlap otyr. Іsti óziniń jeke baqylaýyna alǵan oblys prokýrory Saparbek Nurpeıisov jumbaq oqıǵanyń mán-jáıyn anyqtaýǵa ýáde etti», - delingen «A byl lı malchık?» atty materıalda.