Almatydaǵy Syrtqy ister mınıstrligi ókildiginiń mańyzdylyǵyn arttyrý kózdelgen - Muhtar Tileýberdi

NUR-SULTAN. QazAqparat – Parlament Májilisiniń jalpy otyrysynda Syrtqy ister mınıstri Muhtar Tileýberdi Almaty qalasyndaǵy Syrtqy ister mınıstrligi ókildiginiń zańdy mártebesin anyqtaý jaıynda túsindirdi, dep habarlaıdy QazAqparat tilshisi.

Aıta keteıik, jalpy otyrysta «Qazaqstan Respýblıkasynyń dıplomatııalyq qyzmeti týraly» Qazaqstan Respýblıkasynyń Zańyna ózgerister men tolyqtyrýlar engizý týraly» zań jobasy maquldandy.

«Almaty qalasyndaǵy Syrtqy ister mınıstrligi Ókildigin zańdy turǵydan bekitý arqyly onyń zańdy mártebesin anyqtaý jáne shet memleketter men halyqaralyq uıymdardyń dıplomatııalyq ókildikteri aldynda ókildiktiń mańyzdylyǵyn arttyrý kózdelgen.

Almatyda shet memleketter men halyqaralyq uıymdardyń 100-ge tarta ókildigi jumys isteıtinin jáne olarmen ózara qatynasqa túsý Almaty qalasyndaǵy Ókildigimizge júktelgendigin atap ótý qajet», - dedi M. Tileýberdi.

Onyń aıtýynsha, zań jobasynda burynǵy quqyqtyq olqylyqtardy joıý arqyly jalpy normatıvtik-quqyqtyq bazany jetildirý qarastyrylǵan.

QR Parlamenti Májilisinde qurylǵan jumys tobyndaǵy talqylaý barysynda zań jobasynyń redaktsııalyq bóligi pysyqtaldy jáne basqa zańnama aktilermen sáıkestendirildi.

Budan buryn habarlanǵandaı, atalǵan qujat aıasynda dıplomatııalyq poshtany jınaqtaý men jetkizýdi qamtamasyz etý jónindegi fýnktsııalar bekitiledi.