Almatydaǵy Saıran kóliniń mańynan qarý-jaraq tabyldy
Qarý-jaraq «Qarý» respýblıkalyq jedel aldyn alý is-sharasy barysynda tabyldy. Bul týraly Almaty qalasy boıynsha LA-155/13 QAJD mekemesiniń jedel ýákili Rahat Nurbekov málim etti.
«Almaty qalasy boıynsha LA-155/13 QAJD mekemesiniń jedel tobynyń qyzmetkerleri Almaly aýdandyq polıtsııa basqarmasyna qarasty polıtsııa bóliminiń qyzmetkerlerimen birge Varlamov kóshesi boıynan, Saıran kóline qaraı batys baǵytta qurǵaq butaqtardyń arasynan qarý-jaraq pen oq-dárilerdiń qoımasyn tapty. Onda 12 kalıbrli, eki tegis uńǵyly ańshy myltyǵy, PM gaz tapanshasy, oqtar tabyldy», - dedi Rahat Nurbekov.
Aldyn ala málimet boıynsha tabylǵan qarýlar bıylǵy jyldyń qańtar aıyndaǵy jappaı tártipsizdikter kezinde urlanǵan.
Onyń naqty kimdiki ekendigi saraptamadan keıin anyqtalatyn bolady.
Atalǵan derek boıynsha QR QK-niń 287-baby 2-bóligine sáıkes sotqa deıingi tergeý amaldary bastaldy.
Eske salsaq, jýyrda Almaty qalasy jáne Almaty oblysy boıynsha UQKD qyzmetkerleri men Almatynyń Uıymdasqan qylmysqa qarsy kúres basqarmasynyń qyzmetkerleri eki qap qarý men oq-dári tapqan bolatyn. Túrksib aýdanyndaǵy Gete kóshesinde qarý-jaraq pen oq-dáriniń 20-ǵa jýyq túri jasyrylǵan.
Foto: polisia.kz