Almatydaǵy Prezıdent rezıdentsııasyn basyp alý bılikti qulatý kezeńderiniń biri retinde oılastyrylǵan
«5 qańtarda kúndiz Almaty qalasynda qylmyskerler Áýezov aýdandyq polıtsııa basqarmasy jáne Almaly aýdandyq polıtsııa basqarmasy men bólimshesiniń ákimshilik ǵımarattaryn basyp alýǵa tyrysty. Sol kúni keshke qarýly top qalalyq Polıtsııa departamentiniń ǵımaratyna shabýyl jasady. Olar ártúrli baǵyttardan júıeli túrde shabýyl jasady. Atys qarýy men jarylǵysh zattardy qoldandy. Polıtsııa ǵımaratyn qorshaý bir táýlikten astam ýaqytqa sozyldy. Qala ákimdiginiń ǵımaratyn basyp alǵannan keıin qylmyskerler Prezıdent rezıdentsııasynyń ǵımaratyna kóshti. Shabýyldaýdyń belsendi kezeńi saǵat 15.00-den 16.00-ge deıin boldy. Shabýyldaýshylar basyp alynǵan arnaıy tehnıkany paıdalanyp, ǵımarattyń qaqpasy men qorshaýyn keminde 5 ret buzýǵa tyrysty. Shabýyldaý kezinde qarý dúkenderinen urlanǵan qarýlar qoldanyldy. Tiri qalqan retinde ákimdikke shabýyl jasaý kezinde tutqynǵa alynǵan áskerı qyzmetkerler paıdalanyldy. Qylmyskerlerdiń basym kópshiligi alkogoldik jáne esirtkilik mas kúıinde boldy», - dedi ol Ortalyq kommýnıkatsııalar qyzmetindegi brıfıng barysynda.
Bas prokýratýra ókiliniń atap ótýinshe, sol kúni qarańǵy jáne qalyń tumannyń túsýine baılanysty ǵımaratty qorǵaý múmkin bolmady. Óıtkeni beıbit turǵyndardyń qurban bolý qaýpi joǵary edi.
«Saǵat 19.25-te rezıdentsııanyń qorshaýy Kamazben alyndy jáne qarýly top ishke kirdi. Rezıdentsııany basyp alý bılikti qulatý kezeńderiniń biri retinde oılastyrylǵan. Sebebi mundaı ǵımarat pen ákimdikti basyp alý qalanyń memlekettik basqarý júıesinde haos týdyrýy jáne halyqtyń óz qaýipsizdigi úshin dabyl qaǵýy kerek bolatyn. Ákimdik pen Prezıdent rezıdentsııasyna shabýyldar kezinde qaýipsizdik kúshteriniń eskertýine qaramastan, qylmyskerler qaýip qaterdi, olarǵa qatysty atys qarýyn qoldanýdy uǵyna otyryp, ǵımarattarǵa maqsatty túrde shabýyl jasady. Búgingi kúni Rezıdentsııa ǵımaratyna jasalǵan shabýyldarǵa toıtarys berý kezinde qaza tapqan 12 adam terrorızm aktilerin jasaǵany úshin kúdikti dep tanyldy.Ǵımarattardy qıratýlar, órteý jáne qarýly shabýyldar nátıjesinde Almaty qalasy boıynsha aldyn ala shyǵyn 98 mlrd teńgeni qurady. Onyń ishinde 1 592 bıznes sýbektilerine 92 mlrd teńge zalal keltirildi. Qurylymdyq kúshterdiń 9 qyzmetkeri qaza bolyp, 2 260-y dene jaraqattaryn aldy. Qylmyskerlerdiń kórsetilgen áreketteri zań boıynsha terrorızm aktisi retinde saralanady», - dedi Eldos Qılymjanov.