Almatydaǵy PIK jetekshileri MIB qyzmetine kedergi keltirip otyr

ALMATY. QazAqparat – Qazirgi tańda Almatyda 8 879 kóppáterli turǵyn úı bar. Onyń shamamen 3 908-in qamtıtyn 770 MIB tirkelip, 2 843 qarapaıym seriktestik (QS) tańdaldy. Bul týraly QazAqparat tilshisiniń saýalyna qalalyq ákimdiktiń bergen jaýabynda aıtyldy.

Áleýmettik jelide adamdar páter ıeleri kooperatıvteriniń (PIK) barlyq basshylary múlik ıeleri birlestiginiń (MIB) qyzmetine kedergi keltirip, tıisti qujattardy bermeı otyr dep shaǵymdanýda . Osyǵan oraı, QazAqparat tilshisi Almaty qalasy ákimdigine resmı saýal joldaǵan edi.

«Páter ıeleri kooperatıvinen (PIK) múlik ıeleri birlestigine (MIB) ótý qaǵıdasy boıynsha jumys istep turǵan basqarý organy habarlama alǵan soń, úsh jumys kúni ishinde úı boıynsha barlyq materıaldardy berýge mindetti. Eger olardy óz erkimen berýden bas tartsa, turǵyndar sot organdaryna shaǵym túsire alady. Sebebi, «Turǵyn úı qatynastary týraly» zańǵa sáıkes, turǵyn úı quqyqtyq qatynastarynan týyndaıtyn daýlardy sot sheshedi», - dep jaýap berdi Almaty qalasynyń ákimdigi.

Eske salaıyq, páter ıeleri MIB qurý jónindegi máseleler boıynsha Qazaqstannyń turǵyn úı-kommýnaldyq sharýashylyǵyn jańǵyrtý jáne damytý ortalyǵynan tegin keńes ala alady. Sondaı-aq, buǵan deıin almatylyqtar PIK-ten MIB-ke aýysýdyń qıyndyǵyna shaǵymdanǵan bolatyn.