Almatydaǵy mýzyka mektebiniń orkestri Bashqurtstanda ótken halyqaralyq konkýrstyń Gran-prıin ıelendi
«Almatydaǵy Ahmet Jubanov atyndaǵy daryndy balalarǵa arnalǵan respýblıkalyq qazaq mamandandyrylǵan mýzyka mektep-ınternatynyń halyq orkestri Bashqurtstan Respýblıkasy Mádenıet mınıstrliginiń uıymdastyrýymen ótken «Halyq aspaptar orkestrleri jáne ansamblderi« halyqaralyq onlaın konkýrs-festıvalinde Gran-prıdi jeńip aldy. Orkestr jetekshisi: Bekbolat Ábdiberikuly», delingen habarlamada.
Bashınform agenttiginiń málimetinshe, Halyqaralyq «Zov Ýrala» IV ulttyq aspaptar men orkestrler konkýrs-festıvali 29 jáne 31 naýryz aralyǵynda Ýfada ótken.
Mýzykalyq baıqaý koronavırýs ınfektsııasyna baılanysty onlaın formatta ótkizildi. Jarysqa Reseıdiń jáne Qazaqstan, Ózbekstan, Túrkiııanyń shyǵarmashylyq toptary qatysty.
Konkýrstyń Gran-prı júldesin eki ujym ıelendi, Ahmet Jubanov atyndaǵy daryndy balalarǵa arnalǵan respýblıkalyq qazaq mamandandyrylǵan mýzyka mektep-ınternatynyń halyq orkestri men L. Bezzýbov atyndaǵy Tıýmen orys halyq aspaptary orkestri.
Sondaı-aq, baıqaýdyń eki atalymynda taǵy eki qazaqstandyq óner ujymy birinshi oryn ıelendi. Olar: Aqtóbelik «Amanat» folklor ansambli (jetekshisi Baqytjan Qýandyqov) jáne «Murager» qazaq ult aspaptar ansambli (jetekshisi Aıbek Syzdyqov).