Almatydaǵy qorymnan saq jaýyngeriniń súıegi men altyn buıymdar tabyldy

ALMATY. QazAqparat – Almatyda arheologııalyq qazba jumystary kezinde b.z.d. V-II ǵasyrdaǵy saq dáýiri jaýyngeriniń jerlengen oryny men súıegi tabyldy. Bul týraly QazAqparat tilshisine «Almaty qalasy murajaılar birlestigi» KMQK dırektory Lázzat Saǵyndyqova aıtty.

Spıkerdiń aıtýynsha,16 qazanda Alataý aýdany aýmaǵyndaǵy erte temir dáýiriniń apattyq qorǵandarynda arheologııalyq qazba jumystary júrgizildi.

«Jerleý ornynda altynmen bezendirilgen jaýyngerdiń qarý-jaraǵy, qylyshtyń synyqtary, altynmen qaptalǵan ań stılinde jasalǵan beıneleri bar, kıimge arnalǵan japsyrmalar men kúmis buıymdar tabyldy. Jaýynger súıegi 3 metrden astam tereńdikte ornalasqan aǵash jáshikke salynǵan»,-dedi Lázzat Saǵyndyqova.

Almaty qalasy murajaılar birlestiginiń aǵa ǵylymı qyzmetkeri Murat Nurpeıisov qorymnan tabylǵan zattarǵa qatysty óziniń tujyrymyn aıtty.

«Ol er adam, biraq, jas bolmaǵan. Bas súıegine qaraǵanda, solaı topshylaýǵa bolady. Sondaı-aq onymen birge patshanyń emes, jaýyngerdiń zattary jerlengen. Alaıda ol tekti áýletten shyqqany baıqalady»,- dedi Murat Nurpeıisov.

Ol sondaı-aq Alataý aýdanyndaǵy qorǵandar 1960-shy jyldardyń sońynan belgili bola bastaǵanyn aıtty.

«Munda 9 saq qorǵany tabylǵan. Qazir tek 4 qorǵan qaldy. Qazirgi arheologııalyq qazba jumystary arnaıy apattyq qorǵandaryna júrgiziledi», - dep tolyqtyrdy ol.