Almatydaǵy kóppáterli turǵyn úılerdiń jartysynan kóbi jańa nysanǵa aýysty

ALMATY. QazAqparat - Almatyda qazirgi tańda 857 múlik ıeleriniń birlestigi (MIB) quryldy. Bul týraly brıfıng barysynda qalalyq turǵyn úı saıasaty basqarmasynyń basshysy Danııar Qyryqbaev málim etti, dep habarlaıdy QazAqparat tilshisi.

Spıkerdiń sózinshe, Almaty qalasynda eldegi eń iri turǵyn úı qory bar, onyń 820-dan astam basqarý organdaryna qyzmet kórsetetin 8 879 kóppáterli turǵyn úı (KPTÚ) bar. Onyń 7 129 -y basqarýdyń jańa nysanyna kóshýge jatady.

«Biz qalalyq Jol kartasyn, sondaı-aq turǵyndar arasynda jınalys ótkizý kestesin bekittik. Turǵyndarmen jáne qoldanystaǵy basqarý organdarynyń basshylarymen túsindirý jumystaryn uıymdastyrýdy qamtamasyz etý úshin turǵyn úı ınspektsııasy men aýdandyq ákimdikterdiń apparattary ókilderiniń qatysýymen aýdandar boıynsha segiz mobıldi top quryldy», - deıdi Danııar Qyryqbaev.

Sonymen qatar ol kóppáterli turǵyn úıdiń 4 myńǵa jýyǵy basqarýdyń jańa nysanyna kóshkenin atap ótti.

«Búgingi jaǵdaı boıynsha Almatyda tirkelgen 4 294 kóppáterli turǵyn úıdiń 3 983 jańa nysanǵa kóshti. Onyń ishinde 857 múlik menshik ıeleriniń birlestigi (MIB) jáne 3 126 qarapaıym seriktestik (QS), bul nátıjesinde 60,2%-dy quraıdy. Qoldanystaǵy basqarý organdaryna keletin bolsaq, olar 2022 jyldyń 1 shildesine deıin úıge arnalǵan qolda bar qujattamany MIB tóraǵasyna nemese QS ýákiletti ókiline berýge mindetti»,- dedi spıker.