Almatydaǵy kópqabatty úı turǵyndary 10 kúnnen beri sýsyz otyr

ALMATY. QazAqparat – Almatydaǵy «Nurly dala» kópqabatty keshenniń turǵyndary 10 kúnnen beri sýyq sýsyz otyr, dep habarlaıdy QazAqparat tilshisi.

Oqıǵaǵa qatysty vıdeo jelide tarady.

Almaty qalasynyń qurylys basqarmasy atalǵan másele boıynsha túsinik berdi. Basqarmanyń málimetinshe, «Nurly dala» turǵyn úı kesheninde 2019 jyly sýmen jabdyqtaý júıesi salynǵan. Jobada bolat qubyrlar qarastyrylǵan, biraq qurylys barysynda olardy paıdalaný kezinde jıi isten shyǵa bastaǵan soń, merdiger olardy talshyqty qubyrlarǵa aýystyrdy. Jobalyq sheshimdi ózgertýdiń negizdiligi men júrgizilgen jumystardyń sapasyn sarapshylar baǵalap, nátıjesi boıynsha tıisti sharalar qabyldanady. Qalalyq prokýratýraǵa qajetti tapsyrmalar berildi, jaýaptylar zań aldynda qatań túrde jaýapqa tartylatyn bolady.

«Qazirgi ýaqytta atalǵan turǵyn úıdiń apatty ýchaskesinde «Almaty sý» MKK, qurylys basqarmasy jáne Naýryzbaı aýdany ákimdigi birlesip, sýmen jabdyqtaý qubyryn aýystyrý men burý boıynsha qalpyna keltirý jumystaryn júrgizýde. 18 qazanda óndirýshi zaýyttan qosalqy bólshekter men materıaldar jetkiziledi dep kútilýde. Olar kelgenge deıin daıyndyq jumystary júrgiziledi. Sýmen qamtý jumystary 19 qazanǵa deıin aıaqtalady. Úılerdiń turǵyndaryn ýaqytsha sýmen qamtamasyz etý maqsatynda sý tasıtyn kóliktermen aýyzsý tasymaldanady», - delingen basqarma habarlamasynda.