Almatydaǵy kólik salasyn qandaı reforma kútip tur

ALMATY. QazAqparat - Almatyda ótip jatqan ınvestıtsııalyq forým barysynda qala ákimi Baýyrjan Baıbek ınfraqurylymdyq jobalar men kólik júıesindegi ózgerister týraly aıtty, dep habarlaıdy QazAqparat tilshisi.

Ákimniń aıtýynsha, qazir qalaǵa 700 myńnan asa kólik kirip-shyǵady. Sarapshylar keptelis kesirinen qala 600 mln teńge shamasyndaǵy tabysty joǵaltyp otyrǵanyn aıtqan.

«Sondyqtan, keshendi kólik reformasy qoǵamdyq kólik sapasyn arttyrýǵa, ekologııany jaqsartýǵa, bıznes shyǵyndaryn azaıtýǵa  baǵyttalǵan», - dedi B.Baıbek Almaty Invest forum barysynda.

Aıta keterligi, sońǵy 10 jylda qalada 30-dan asa jol aıryǵy salynǵan. Jaqyn arada 3 nysan paıdalanýǵa beriledi. Bul nysan paıdalanýǵa berilse, kishi kólik «saqınasyn» qurýǵa múmkindik paıda bolady.

Sonymen qatar, qalada memlekettik jekemenshik áriptestik boıynsha Úlken Almaty aınalma jolynyń qurylysy bastaldy.

«Quny 1,4 mlrd dollar bolatyn bul aýqymdy joba Almatyny Batys Eýropa-Batys Qytaı kólik dáliziniń bir torabyna aınaldyrady. Úlken Almaty jolynyń arqasynda Almatyǵa bir táýlikte kiretin kólikterdiń 40 000 myńy syrttan aınalyp ótetin bolady. Úlken joba arqyly servıstik kompanııalarǵa jaqsy ınvestıtsııa tartýǵa bolady», - dedi Baýyrjan Baıbek.
 

Odan bólek, qalada 2 temir jol vokzaly qaıta jańǵyrtýdan ótip jatyr. Jekemenshik ınvestıtsııalar esebinen Almaty áýejaıyn qaıta jasaý josparlanyp otyr. Bul áýejaıdyń ótkizý múmkindigin 2,5 ese, ıaǵnı 13 mln jolaýshyǵa deıin arttyrady.

Almatyda birinshi ret BRT jelisi iske qosyldy. Zamanaýı elektrobýs shyǵaratyn «Falcon Eurobus» zaýyty ashyldy. Ákim kólik salasyndaǵy eń kóp ınvestıtsııa salynatyn iri jobalardyń biri - metro men LRT ekendigin aıtty.